Լրագրողների հետ հանդիպման ժամանակ ՀՀԿ ներկայացուցիչ Մենուա Հարությունյանն անդրադառնալով Հայաստանի արտաքին քաղաքականությանը՝ ասել է, թե առաջիկա մի քանի ամսվա կամ տարվա ընթացքում ղարաբաղյան հակամարտության հարցում էական փոփոխություն չի լինի։

-ԼՂ-ի հարցում ժամանակ առ ժամանակ գործընթացներն արագանում են, հանդիպումներ են տեղի ունենում, բայց իմ համար մի բան ակնհայտ է՝ Լեռնային Ղարաբաղի հարցի կարգավորման գործընթացը հասել է մի կետի, որից հետո տնտեսական դաշտում է սկսվել պայքարը։ Հետևաբար մեր երկու պետությունները՝ Արցախը և ՀՀ-ն, պետք է իրենց տնտեսությունները զարգացնեն, որ հետ չմնան նավթային ռեսուրսներով զարգացող Ադրբեջանից։ Սա հստակ է, և հարցի լուծումը հենց այս կոնտեկստում եմ պատկերացնում։ Պետք է զարգացնենք, որ մարտահրավերներին կարողանանք դիմագրավել,-նշել է նա։

Անդրադառնալով հայ-թուրքական հարաբերությունների կարգավորման գործընթացին՝ Մենուա Հարությունյանն ասել է, թե գործընթացը գնալով ավելի է բարդանում։

-Հենց այսօր Էրդողանը դարձյալ տվել է կոշտ գնահատականներ, և կարծում եմ, որ այս տիպի գնահատականներով նա գործընթացը տանում է փակուղի,-նշել է նա։

Նրա խոսքերով՝ ակնհայտ չէ, որ գործընթացը մտնի փակուղի, բայց թուրքական կողմի վարքագիծը դրան կտանի։

ՍԴՀԿ անդամ Նարեկ Գալստյանն էլ նշել է, թե հայ-թուրքական հարաբերությունների հաստատման գործընթացում Հայաստանը հսկայական շահաբաժին է կորցրել, իսկ Թուրքիան՝ շահել։

-Այսօր քաղաքական դաշտի մի մասը թե՛ իշխանության, թե՛ ընդդիմության մեջ (օրինակ՝ ՀԱԿ-ը) ղարաբաղյան և հայ-թուրքական գործընթացներում ինչ-որ չափով համամիտ է, ինչն ինձ համար ցավալի է, որովհետև Հայաստանում այսօր անհրաժեշտ է հզոր ընդդիմություն, որը կկարողանա այս գործընթացներին դեմ կանգնել։ Այսօր Հայաստանն ունի ժողովրդավարության հետ կապված լրջագույն խնդիրներ, որոնք օրհասական են և օր առաջ լուծվելու կարիք ունեն, բայց  հայ-թուրքական գործընթացն ու Արցախի խնդիրը մեծ հաշվով մեզ կանգնեցրել է, չեմ ուզում խիստ գույներով ներկայացնել, բայց... լինել -չլինելու առջև,-նշել է նա։

7or.am