Գերմանիայի դաշնային հանրապետության կանցլեր Անգելա Մերկելը հայտնել է, թե Բեռլինը շարունակում է պնդել, որ Թուրքիան ԵՄ-ի համար արտոնյալ գործընկերոջ կարգավիճակ ունենա։

Ինչպես հաղորդել է «ИТАР-ТАСС»-ը, նրա խոսքերով, սակայն, Թուրքիային այդպիսի կարգավիճակով ԵՄ ընգրկելու նախաձեռնությունը ոչ ճիշտ է ընկալվել։

-Խոսելով արտոնյալ գործընկերոջ մասին՝ մենք նկատի ունեինք Թուրքիայի և Եվրամիության հատուկ հարաբերությունները, որի համար այդ երկիրը շատ կարևոր է տնտեսական, մշակութային և գիտական տեսանկյուններից։ Դրանից բացի, Եվրամիությունը փոխվել է։ Փոխվել են նաև խաղի կանոնները,-ասել է կանցլերը։

Ա. Մերկելի խոսքերով՝ Թուրքիայի եվրաինտեգրման գործընթացը բաց է, այսինքն՝ առանց լիիրավ անդամության խիստ երաշխիքների։

-Մենք շարունակում ենք բանակցությունները, բայց նախ և առաջ անհրաժեշտ է, որ Թուրքիան վավերացնի ու սկսի իրականացնել իր արձանագրությունների կետերը և լուծի Կիպրոսի խնդիրը,-ընդգծել է նա։

Բայց, միևնույն ժամանակ, Մերկելը Թուրքիա կատարած երկօրյա այցի ժամանակ փոխել է իր դիրքորոշումը՝ հայտարարելով, թե համաձայն է Թուրքիայի վարչապետ Էրդողանի հետ այն հարցում, որ Գերմանիայում բացվեն թուրքերենի ուսուցմամբ դպրոցներ։ Նա այդ մասին հայտարարել էր մարտի 29-ին՝ իր թուրք գործընկրոջ հետ համատեղ մամլո ասուլիսում։

-Քանի որ Գերմանիան դպրոցներ ունի այլ երկրներում, միանգամայն բնական է, որ Թուրքիան էլ կարող է իր դպրոցներն ունենալ Գերմանիայում։ Միևնույն ժամանակ դա չպետք է վերածվի պատրվակի, որ թուրք դպրոցականները գերմաներեն չսովորեն,-«Hurriyet»-ի հաղորդմամբ ասել է կանցլերը։

 Այս առումով Մերեկելը նշել է, որ Գերմանիայում մարդ չի կարող ապրել առանց գերմաներեն իմանալու։ Եվ այդ կապակցությամբ հատուկ ընդգծել է, որ խոսքը բոլորովին էլ թուրքերի ձուլման մասին չէ, այլ ներգրավման։