Լրագրողների հետ հանդիպման ժամանակ ՀՀԿ խմբակցության նախագահ Գալուստ Սահակյանը, պատասխանելով այն հարցին, թե ո՞ւմ կպաշտպանի, եթե 2013-ին և՛ Սերժ Սարգսյանը, և՛ Ռոբերտ Քոչարյանն առաջադրվեն, ասել է, թե կանխավարկածային չէ, որ Ռոբերտ Քոչարյանն ու Սերժ Սարգսյանը միասին դնեն իրենց թեկնածությունը։

-Նախ և առաջ ասեմ, որ միանշանակ է, որ 2013-ին գործող նախագահը նորից իր թեկնածությունը կդնի, և կանխավարկածային չէ, որ Ռոբերտ Քոչարյանն ու Սերժ Սարգսյանը միասին դնեն։ Դրանք շարունակվող ծրագրեր են, և այս անգամ այդ շարունակությունն ապահովում է Սերժ Սարգսյանը,-նշել է նա։

Նրա խոսքերով՝ նման որոշումները կայացվում են քաղաքական իրավիճակների հետևանքով, և ինքը համոզված է, թե գնալով մեր երկրի քաղաքական վիճակն ավելի կայուն է լինելու։

-Համոզված եմ, որ այն խնդիրներին, որոնք մենք այսօր որդեգրել ենք, փորձելու ենք ամբողջական լուծումներ տալ, և սա է հենց այն վստահությունը, որ արտահայտվում է, որ կուսակցությունն իր ծրագիրն ունի, իսկ Սերժ Սարգսյանը կուսակցության նախագահն է, և մենք  այդ ծրագիրը պետք է փորձենք մինչև վերջ տանել,-նշել է Գալուստ Սահակյանը։

Իսկ ՀՀԿ խորհրդի անդամ Վազգեն Կարախանյանն էլ ասել է, թե ժամանակը կգա, և ամեն ինչ պարզ կլինի։

-Բոլոր դեպքերում մենք՝ ՀՀԿ կուսակցության անդամներս, առաջնորդվում ենք կուսակցության որոշումներով, իսկ  քանի որ այս պահին ուրիշ որոշում չկա, ես կարծում եմ, ավելի ճիշտ՝ հաստատապես մենք պաշտպանելու ենք Սերժ Սարգսյանի թեկնածությունը,-նշել է նա։

7or.am