Քիչ առաջ մեկնարկել է Հայ ազգային կոնգրեսի հանրահավաքը։ Բացման խոսքում ՀԺԿ քարտուղար Գրիգոր Հարությունյանը նշել է, որ շուրջ մեկ ամիս է անցել ՀԱԿ վերջին հանրահավաքից, սակայն ոչ մի լուծում չի տրվել իրենց բարձրացրած որևէ խնդրի։

«Ավելին՝ գազի սակագինը բարձրացել է, և դրա հետ միասին  բարձրացել են բազմաթիվ ապրանքների գներ»,-ասել է ՀԺԿ քարտուղարը։ Անմիջապես նրանից հետո ելույթ է ունեցել Քաղբանտարկյալների կանանց կոմիտեի նախագահ Մելիսա Բրաունը, ով Ալիկ Արզումանյանի կինն է։ Նա նշել է, որ այլևս քաղբանտարկյալի կին չէ, քանի որ իր ամուսինը դուրս է եկել բանտից, սակայն իր ընկերուհիների ամուսինները շարունակում են մնալ քաղբանտարկյալի կարգավիճակում։ Մելիսա Բրաունը նշել է, որ հանդիպել է մարդու իրավունքների խնդիրներով զբաղվող եվրոպական կառույցների ներկայացուցիչների հետ և ներկայացրել է նրանց բոլոր խնդիրները։ Նա նաև ընդգծել է, որ նույն այդ կառույցների ներկայացուցիչների համար, ովքեր ներկա պահին Հայաստանում են, իշխանությունները թատերական բեմականացում են պատրաստել՝ դուրս բերելով ոստիկաններին Մատենադարանին հարող տարածքից։