«Հայկական ընտրություն» կուսակցության նախաձեռնող խմբի անդամ, արցախցի քաղաքագետ Ալեքսանդր Քանանյանն այսօր «7օր»-ի հարցին ի պատասխան ասել է, որ եթե հիմք ընդունենք և առաջնորդվենք Հայաստանի առաջին նախագահի գծած կաղապարով, ըստ որի գոյություն ունեն ՀՀ և ԼՂՀ, ապա Սերժ Սարգսյանը որևէ իրավունք չուներ արցախյան տարածքների ճակատագրի մասին որևէ դատողություն, առավել ևս՝ որոշակի քաղաքական պատասխանատվություն ենթադրող հայտարարություններ անել, քանզի չի ներկայացնում ԼՂՀ ժողովրդին, և այսօր առկա չէ միջպետական որևէ պայմանագիր, որով ԼՂՀ-ն կլիազորեր Հայաստանի նախագահին այդպիսի բանակցություններ վարել և Արցախի սահմանների ճշգրտմանը վերաբերող հայտարարություն կատարեր։

Հիշեցնենք, որ սիրիական «Al Watan» թերթին տված հարցազրույցում ՀՀ նախագահ Սերժ Սարգսյանը հայտարարել էր, որ անվտանգությունն ամրապնդելու համար Ղարաբաղի շուրջ ձևավորվել է անվտանգության գոտի, և երբ Ղարաբաղի ժողովուրդը ստանա իր ինքնորոշման իրավունքն իրագործելու իրական հնարավորություն, ու ստեղծվեն անվտանգության և զարգացման գործնական մեխանիզմներ, հայկական կողմի փոխզիջում կարող է դիտվել Ղարաբաղի շուրջ գտնվող այդ շրջանների վերադարձն Ադրբեջանին՝ իհարկե պահպանելով Լեռնային Ղարաբաղն ու Հայաստանը կապող միջանցքը:

«7օր»-ի հարցին՝ ինչպե՞ս է Սերժ Սարգսյանի այս հայտարարությունն ընկալվել Արցախի բնակչության կողմից, արցախցի քաղաքագետը պատասխանել է.

-Քոչարյանի նախագահության օրոք կարող եմ ասել մի տարօրինակ երևույթ՝ արցախյան հանրությունը լայն առումով համարյա չէր հետևում գործընթացին՝ որոշակի վստահություն տածելով Ռոբերտ Քոչարյանի անձի և, իրենց գնահատմամբ, նրա անձին հատուկ ինչ-ինչ կարծր կամային գծերի նկատմամբ։ Այս պահի դրությամբ Սերժ Սարգսյանն իր նախաձեռնողական քաղաքականությամբ հասցրել է Արցախի բնակչության լայն շրջանակներում լուրջ մտահոգություններ հարուցել, հետևաբար այսօր արցախցին շատ ավելի հետևողականորեն է փորձում գնահատել Սերժ Սարգսյանի քաղաքականությունը։ Այս պահի դրությամբ դեռևս գերիշխում է հանճարեղ բլեֆային քաղաքականության մասին պատկերացումը, այսինքն՝ իրենք կարծում են, որ այս հայտարարությունները մի գերճկուն, գերհանճարեղ քաղաքական գծի դրսևորումներ են, այսինքն՝ ինքը գերազանց բլեֆ է տանում աշխարհի գերհզոր պետությունների ղեկավարությունների հետ՝ կարողանալով ժամանակավորապես պլստալ բարդ ճնշումներից և իրավիճակներից։ Բայց, այնուամենայնիվ, մտահոգությունը շատ ավելի մեծ է։ Իհարկե Արցախի պաշտոնական մի շարք ներկայացուցիչներ փորձել են լղոզել Սերժ Սարգսյանի Սիրիայի հայտնի հայտարարությունը՝ ասելով, որ ինքը ցանկացած պարագայում Արցախը չի ներկայացնում, և ամենակարևորը՝ ինքն այդտեղ նշեց ինքնորոշման իրավունքը, իսկ այսօր Ադրբեջանը պատրաստ չէ ճանաչել ինքնորոշման այս իրավունքը։

7or.am