«Եթե կա քաղաքական կամք, ապա գործող մարմիններն էլ բավարար են կոռուպցիայի դեմ պայքարելու համար»,֊«Ազատության» հետ զրույցում համոզմունք հայտնեց ընդդիմադիր «Բարգավաճ Հայաստան» խմբակցության պատգամավոր, Մարդու իրավունքների հանձնաժողովի նախագահ Նաիրա Զոհրաբյանը` շեշտելով, որ իր համար պարզ չէ, թե ինչու է կառավարությունը ցանկանում կոռուպցիայի դեմ պայքարելու համար «մոնստր մարմին» ստեղծել:

Հակակոռուպցիոն ռազմավարության ծրագրի շրջանակներում նոր կառավարությունը նախատեսվում է ստեղծել Հակակոռուպցիոն կոմիտե:

«Մենք նախկինում ունեցել ենք փորձերը սուպերնախարարությունների, որոնք այնուհետև վերածվել են մոնստրի, հենց ամենամեծ կոռուպցիոն կառույցների,-մեկնաբանեց Նաիրա Զոհրաբյանը,-Տարիներ շարունակ մարդիկ, ովքեր էսօր ապրում են արաբական շեյխերից ավելի ճոխությամբ և հիմա էլ, ի դեպ, շատ հանգիստ իրենց կարող ես տեսնել Երևանի տարբեր սրճարաններում փռված և վայելելիս․․․ նրանք պիտի ենթարկվեն պատասխանատվության, դա իմ հստակ դիրքորոշումն է, բայց միայն և բացառապես իրավական դաշտում: Քաղաքական ցանկացած պրեսինգ, քաղաքական ցանկացած նյուանս ստվերելու է այն ամբողջ առողջացման գործընթացը դատաիրավական համակարգի, որին մենք փորձում ենք հավատալ»:

«Ազատության» հարցին՝ արդեն գործող, առկա մարմինները բավարար չե՞ն, եթե առանձին հակակոռուպցիոն կենտրոն ստեղծվի, որը միայն զբաղվի կոռուպցիոն հանցագործություններով, սա արդյունավետությունը կբարձրացնի՞ կոռուպցիայի դեմ պայքարի, Նաիրա Զոհրաբյանը պատասխանեց․ «Ես չեմ կարող ասել: Ես կարծում եմ, որ եթե կա քաղաքական կամք, ապա գործող մարմինն էլ միանշանակ բավարար է: Թե ինչի համար է ստեղծվում այդ մոնստր մարմինը՝ ես կարծում եմ առաջիկայում, երբ որ նման մարմին ստեղծվի, իշխանությունները պարտավոր են համապատասխան պարզաբանմամբ հանդես գալ»:

Հակակոռուպիցոն կոմիտեից բացի նախատեսվում է ստեղծել հատուկ կոռուպցիոն գործերի քննությամբ զբաղվող դատարան, ինչպես նաև «Կոռուպցիայի կանխարգելման» հանձնաժողով: Այս անկախ հանձնաժողովը քննելու է բարձրաստիճան պաշտոնատար անձանց՝ բացառությամբ պատգամավորների, դատավորների և դատախազների էթիկայի կանոնների խախտումների վերաբերյալ դիմումներ, վարելու է բարձրաստիճան պաշտոնատար անձանց հայտարարագրերի ռեեստրը, հրապարակելու հայտարարագրերը, քննելու է դրանց առնչվող խախտումների վերաբերյալ գործեր։

Մարդու իրավունքների հանձնաժողովի նախագահն ասում է, թե պարզ չէ՝ ինչպես է նույն խնդրով զբաղվելու 3 տարբեր մարմին: «Այստեղ առաջանալու է աջապսանդալային իրավիճակ»,-ասում է Նաիրա Զոհրաբյանը: