ՀՀԿ խմբակցության ղեկավար Գալուստ Սահակյանն այսօր «Իրավունք դե ֆակտո» ակումբում մտահոգություն է հայտնել, որ գիրքը նահանջ է ապրել, և այն պետք է նորից հասարակությանը ծառայեցնել։

-Ամբողջ ազգը վարակված է կոմպյուտեր խաղալով և հեռահար հոդվածներ գրելով լրատվությունում,- ասել է Գ. Սահակյանը,- եթե բջջային հեռախոսը լիցքավորվում է, մարդն էլ լիցքավորվում է կարդալով։ Այնպես որ, կարդալու նշանակությունը մեծ է, և լրագրողներին էլ խորհուրդ կտայի կարդալ, որովհետև հետևյալ որակներն եմ ես արդեն նկատում...մի անեկդոտ պատմեմ։ Աշխատողը մտնում է պետի մոտ, խնդրում է, որ արձակուրդ տա։ Ասում է՝ դիմում գրի։ Աշխատողը գրում, պատռում է, գրում, պատռում է։ Պետն ասում է՝ շտապի՛ր, ես պետք է շտապ դուրս գամ։ Ասում է՝ դե ի՞նչ անեմ, իմ ղեկավարն եք, բայց գրում, գրում եմ, կլյաուզա է դուրս գալիս։ Այսինքն, հիմա լրատվությունն էլ է այդ ճանապարհով գնում։ Սկզբից հանդարտ, հանգիստ գրում են, վերջում զրպարտություն է դուրս գալիս։ Իհարկե բոլորին չի վերաբերում։ Սրանից էլ պետք է կարողանանք մաքրել մեր կյանքը։

Իսկ լրագրողի հարցը՝ անձամբ նա ի՞նչ գիրք է կարդացել, Գ. Սահակյանին վիրավորել է.

-Ես ոչ միայն գիրք եմ կարդում, այս պահին բոլորիդ հոգիներն եմ կարդում։ Ես վիրավորվում եմ, որ այդ հարցն ինձ եք տալիս։ Իմիջիայլոց, ես ամբողջ հայ գրականությունն ավարտել եմ 6-րդ դասարանում։ Որովհետև բանասեր եմ, ծանոթ եմ ամբողջ արտասահմանյան գրականությանը։ Ամեն օր անպայման նորից կրկնում, կարդում եմ։ 57թ. լույս ընծայված Տերյան ունեմ, որն իմ սեղանի զարդերից մեկն է, իմ կտակարանն է դարձել։ Այնպես որ, հոգևոր արժեքներով ապրած մարդկանց չի կարելի նման հարց տալ։ Ինչպես, ասենք, մարդասպանին հարց տաս՝ դու անմե՞ղ ես, թե՞ մեղավոր։ Նույն կշիռներն են։

7or.am