ՀՀ քննչական կոմիտեի Կոտայքի մարզային քննչական վարչությունում ավարտվել է երկու անձի դանակահարության դեպքի առթիվ հարուցված քրեական գործի նախաքննությունը: Մեղադրանք է առաջադրվել 28-ամյա երիտասարդին:

Նախաքննության ընթացքում պարզվել են միջադեպի մի շարք հանգամանքներ, շարժառիթը:

ՀՀ Քննչական կոմիտեից հայտնում են, որ մինչդատական վարույթում ձեռք բերված տվյալների համաձայն՝ 2018թ. հուլիսի 24-ին՝ ժամը 16:30-ի սահմաններում, Կոտայքի մարզի՝ 1991թ. ծնված բնակիչն իր կողմից վարած «ՎԱԶ 2108» մակնիշի ավտոմեքենայով Կոտայքի մարզի Պտղնի գյուղից ուղեւորվել է Երեւան-Սեւան մայրուղու սկզբնամասում գտնվող հացատուն: Ճանապարհին նա դուրս է եկել «Mersedes Benz» մակնիշի ավտոմեքենայի դիմաց, ինչի արդյունքում վերջինիս վարորդին թվացել է, որ «ՎԱԶ 2108» մակնիշի ավտոմեքենան հարվածել է իր ավտոմեքենային:

Հասնելով հացատան մոտ՝ 28-ամյա երիտասարդն ավտոմեքենան կայանել է եւ մտել հացատուն, իսկ «Mersedes Benz»-ի վարորդն ընկերոջ հետ, իր մեքենան կայանելով նույն վայրում, սպասել է նրան՝ իր ավտոմեքենայի ընթացքը խանգարելու հարցի շուրջ պարզաբանումներ ստանալու համար, ինչը վերաճել է վիճաբանության, որի ժամանակ էլ երիտասարդն իր «ՎԱԶ 2108» մակնիշի ավտոմեքենայից վերցրել է դանակ եւ հարվածել «Mersedes Benz»-ի վարորդի աջ աճուկային շրջանին՝ նրա առողջությանը պատճառելով կյանքին վտանգ սպառնացող ծանր վնաս:

Մարմնական վնասվածք ստանալուց հետո վերջինս ընկերոջ հետ դիմել է փախուստի, սակայն 28-ամյա երիտասարդը նույն դանակով հարվածել է նաեւ «Mersedes Benz»-ի վարորդի ընկերոջը՝ պատճառելով առողջության թեթեւ վնասի հատկանիշներ չպարունակող մարմնական վնաս:

Ձեռք բերված բավարար ապացույցների հիման վրա՝ 28-ամյա երիտասարդին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով:

Հայտարարվել է նախաքննության ավարտի մասին, եւ քրեական գործը՝ մեղադրական եզրակացությամբ, ուղարկվել դատարան: