Ադրբեջանական «ԱՊԱ» գործակալությանը տված հարցազրույցում Չեխիայի արտգործնախարար Յան Կոգոուտն ասել է, որ իրենք ուշադրությամբ հետևում են ԵԱՀԿ Մինսկի խմբի միջնորդությամբ իրականացվող Լեռնային Ղարաբաղի խաղաղ կարգավորման գործընթացին։

-Ինչպես գիտեք, նախկին Չեխոսլովակիան Մինսկի խմբի առաջին անդամներից մեկն էր, և մենք վստահ ենք, որ ԼՂ-ի հակամարտության կարգավորման հարցում այդ խումբը պետք է պահպանի իր առաջնային դերը։ Այդ կապակցությամբ Չեխիայի Հանրապետությունը կողմ է արտահայտվում հակամարտության խաղաղ կարգավորմանը՝ հիմնված Մինսկի խմբի շրջանակներում ամրագրված բոլոր սկզբունքների վրա, ներառյալ ինքնիշխանության հարգումը, տարածքային ամբողջականությունը և Ադրբեջանի միջազգայնորեն ճանաչված սահմանների անձեռնմխելիությունը։ Եվ Չեխիան պատրաստ է աջակցել բոլոր ջանքերին, որոնք նպաստում են հակամարտության խաղաղ կարգավորմանը,- ասել է Չեխիայի ԱԳ նախարարը։

Նա նաև հավելել է, որ ԼՂ հակամարտության կարգավորման միակ ճանապարհն ուղիղ բանակցություններն են և այդ առումով ողջունել է Հայաստանի և Ադրբեջանի նախագահների հանդիպումների նախորդ տարվա ակտիվացումը.

-Հուսով եմ, որ մադրիդյան նորացված փաստաթուղթը, որը հունվարի վերջին Սոչիում կայացած հանդիպման ժամանակ ներկայացվել է ԵԱՀԿ ՄԽ համանախագահների կողմից, հակամարտության վերջնական կարգավորման հիմք կհանդիսանա։  

7or.am