Զրպարտության համար հայց ենք ներկայացնում ընդդեմ Արարատի մարզպետ Գարիկ Սարգսյանի, որ դիմենք դատարան, որովհետև իր կողմից հնչել են գնահատականներ, մտքեր, որոնք իրականության հետ որևէ աղերս չունեն: Այս մասին հրավիրված ասուլիսի ժամանակ հայտարարեց Ավշարի համայնքապետ Սուրիկ Գրիգորյանի փաստաբան Սամվել Սիմոնյանը:

«2018-ից իրենք տարատեսակ անանուն, անստորագիր, անհասցե գրություններով ստուգումներ են իրականացրել Ավշարում՝ պարզելու, գտնելու ինչ-որ լուրջ խնդիրներ, ֆինանսական չարաշահումներ, մինչդեռ ոչինչ չի հայտնաբերվել այդ ստուգումների հետևանքով»,- ասաց նա:

Նա պարզաբանեց, որ 2018-ին ինչ-որ բաներ էին փնտրում, չգտան, անցան երկրորդ ծրագրին և հին դպրոցի շենքի հետ կապված հարցը բարձրացրին: «Մարզպետարանից աշխատողներ էին եկել և կատարել տեղատեսություն, այնտեղ հայտնաբերելու բան չկար, իրենց խնդիրն էր ինչ-որ կերպ ֆինանսական չարաշահում գտնել համայնքի ղեկավարների գործողություններում»,- նշեց նա:

Նա նշեց, որ բացի այդ Սարգսյանը ստել է՝ ասելով, թե համայնքապետն ընդունել է մեղքը: «Սարգսյանն ասում է, որ համայնքի ղեկավարն ընդունել է մեղքը, այս պահին պետական շահի վերականգնման պրոցես է սկսվելու դատարանում և դպրոցի այդ շենքը՝ պետական գույքը ետ է վերադարձվելու պետությանը: Գարիկ Սարգսյանը չգիտես, թե որտեղից վերցրել է և հանրությանը ներկայացնում է, թե պարոն Գրիգորյանն ընդունում է մեղքը, նման բան գոյություն չունի, ավելին՝ նշված քրեական գործը կարճվել է: Այսինքն՝ վարույթը կարճված է և նշված է՝ մեղքի ընդունում չի եղել Գրիգորյանի կողմից»,- ասաց նա:

Աղբյուրը՝ Tert.am