Միջազգային շուկայում վառելանյութի գների տատանումներից Հայաստանի տնտեսությունը տուժում, քանի որ փոքր երկիր է: Այս մասին Tert.am-ի հետ զրույցում ասաց տնտեսագետ, Ազգային ժողովի նախկին պատգամավոր Վարդան Բոստանջյանը` անդրադառնալով, նավթի, բենզինի գնի նվազմանը և պղինձի գների անկմանը:

Անդրադառնալով կորոնավիրուսի վարակի դեմ պայքարի շրջանակներում Իրանի հետ սահմանի ժամանակավոր փակվելուն՝ տնտեսագետն ասաց, որ ստեղծվել է մեր կամքից անկախ իրավիճակ, երբ սահմանափակումների պատճառով որոշակի գործարքներ չեն կայանում, և դեռ գնահատված չէ դադարած գործարքների թիվը:

Հիշեցնենք, որ հաշվի առնելով նոր տիպի կորոնավիրուսով պայմանավորված համաճարակային իրավիճակը՝ ժամանակավորապես կասեցվել է «Հայաստանի Հանրապետության կառավարության և Իրանի Իսլամական Հանրապետության կառավարության միջև քաղաքացիների առանց մուտքի արտոնագրի այցելությունների մասին» հուշագիրը:

Նախկին պատգամավորն ասաց, որ Հայաստանի իշխանության համար տնտեսական խնդիրները մղվել են երկրորդ պլան, բայց դրա պատճառը միայն հանրաքվեի անցկացումը չէ:

«Թող պատկերացում չձևավորվի, թե հենց այս հանրաքվեի պատճառով է տնտեսական խնդիրները մղվել երկրորդ պլան: Եթե կորոնավիրուսն էլ չլիներ, միջազգային շուկայում վառելանյութի տատանումն էլ չլիներ, մեր իշխանությունները դեռևս սևեռված չեն տնտեսական զարգացումների ուղղությամբ: Բոլոր դեպքերում իրենց մնում է աշխատել այդ փուչ «Այո»-ի վրա, որը հակասահմանադրական, հակաիրավական գործընթաց է»,-ասաց նա:

Վարդան Բոստանջյանը նշեց, որ իշխանությունը չի զբաղվում տնտեսական խնդիրներով, քանի որ արհեստավարժության պակաս կա, ոլորտի հետ առնչություն չունենալը կամ մակերեսային առնչություն ունենալը, որը խնդիրներ լուծելու համար շատ քիչ է: