Ազգային ժողովում հրավիրված արտահերթ նիստի մասին ԱԺ «Լուսավոր Հայաստան» խմբակցության պատգամավոր Տարոն Սիմոնյանը տեղեկացել է զանգվածային լրատվության միջոցներից։

«Ինձ ոչ ոք չի ասել, որ արտահերթ նիստ է լինելու։ Քիչ առաջ խմբակցությանը տեղեկացրել են, որ նիստ պետք է անենք, բայց սա կարգ չէ, ձև չէ, որ իշխանությունները որդեգրել են»,-«Փաստինֆո»-ի հետ զրույցում ասաց Սիմոնյանը։

Նա ընդգծեց՝ ընդդիմությանը մեկ րոպե առաջ տեղեկացնելը, որ նիստ է գումարվելու, եկեք, ևս մեկ անգամ ֆիքսում է, որ իշխանությունները որդեգրել են պառլամենտարիզմը ոչնչացնելու քաղաքականություն։

Հարցին, պատրաստվու՞մ եք նիստին մասնակցել, նա պատասխանեց․ «Ո՞նց գնանք, եթե մեկ րոպե առաջ են ասում, որ արտահերթ նիստ է»։

Անդրադառնալով դիտարկմանը, թե հրավիրված նիստում քննարկվելու է այսօր առավոտյան չընդունված «Արտակարգ դրության իրավական ռեժիմի մասին» օրենքում «լրացումներ կատարելու մասին» և «Էլեկտրոնային հաղորդակցության մասին» օրենքում «լրացում կատարելու մասին» օրենքների նախագծերի փաթեթն առաջին ընթերցմամբ քննարկելու հարցը՝ Սիմոնյանն ասաց․ «Չի կարելի մեկ օրում նույն հարցն անընդհատ բերել, երբ ԱԺ-ն մեկ անգամ արդեն մերժել է դա»։