Շատ ափսոսում եմ այն մի քանի վայրկյանը, որ պետք է անդրադառնամ ձեզ: Այս մասին, այսօր՝ մայիսի 8-ին, ԱԺ-ում հայտարարեց ԼՀԿ խմբակցության ղեկավար Էդմոն Մարուքյանը՝ անդրադառնալով «Իմ քայլը» խմբակցության պատգամավոր Բաբկեն Թունյանին:

Նա դիմելով Թունյանին, շարունակեց. «Ասում ենք, որ մեզ զանգում են էս-էս հարցերով, գալիս եք մեծախոս ձևի, ամբարտավանությամբ ամբիոնից ասում եք՝ սուտ են խոսում, ոչ մեկին չեն զանգում, սա էլ իմ համարն է: Դրանից հետո 120 զանգ ես ստանում, ասում ես՝ «Լուսավոր Հայաստանն» է համարս տվե՞լ: Մեծ մարդ ես: Որ ամբիոնից ասում ես սրիկա, ես չեմ ասում, որ ինձ վրա եմ վերցնում, բայց դա լարվածություն է առաջացնում: Մի արեք տենց բաներ»,-ասաց Մարուքյանը:

Հենց դրանից հետո էլ տեղից «Իմ քայլի» պատգամավոր Սասուն Միքայելյանը սկսեց բղավել, Մարուքյանն իջավ եւ ծեծկռտուք սկսվեց: Սասուն Միքայելյանը բռունցքներով հարձակվեց Մարուքյանի վրա: Այդ ընթացքում Մարուքյանին հարվածներ հասցրին նաեւ «Իմ քայլից» Արտակ Մանուկյանն ու Վահե Ղալումյանը:

Աղբյուրը՝ news.am