ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հայկ Ալումյանն անհիմն է որակում Վարչական դատարան ԱՆ Քրեակատարողական ծառայության կողմից ներիկայացված միջնորդությունը։

Հիշեցնենք, որ ՔԿԾ-ն դատարան է դիմել՝ խնդրելով վերացնել Հայաստանի երկրորդ նախագահ Ռոբերտ Քոչարյանին մինչև կորոնավիրուսի համավարակի ավարտը «Իզմիրլյան» բժշկական կենտրոնում թողնելու որոշումը։ Հիշեցնենք, որ դռնփակ նիստում Վարչական դատարանը բավարարել է երկրորդ նախագահ Ռոբերտ Քոչարյանի պաշտպան Արամ Օրբելյանի հայցադիմումը, ըստ որի արտակարգ դրության ընթացքում Ռոբերտ Քոչարյանը կմնա «Իզմիրլյան» ԲԿ-ում։

Արտակարգ դրությունն ավարտվում է հունիսի 13-ին ժամը 17:00-ին՝ այսինքն հինգ օրից։

«Եթե մինչև այս գործի քննության ավարտը պարոն Քոչարյանը կտեղափոխվի քրեակատարողական հիմնարկ, ապա հայցի առարկան վերանում է»,-մանրամասնեց փաստաբանը։

Ալումյանն այս հայցի հետ կապված ուշադրություն է հրավիրում մի հետաքրքրիր նրբության վրա՝ հիշեցնելով, բոլոր կողմերը՝ թե դատախազությունը, թե դատարանները, որոնք Քոչարյանի կալանավորումը հիմնավորելիս նշել են, որ խափանման այդ միջոցն անհրաժեշտ է, որպեսզի Ռոբերտ Քոչարյանը չկարողանա ազդեցություն ունենալ գործի ընթացքի վրա, կարող է թաքնվել, խոչընդոտել և այլն։

«Եթե այս պահին պարոն Քոչարյանը գտնվում է հիվանդանոցում ու մեկուսացման պայմաններում, այսինքն, այդ հայտարարված նպատակներն ամբողջությամբ իրականացվում են այս պահին ԲԿ-ում։ Բայց, այնուամենայնիվ, տեսնում եք, որ գլխավոր դատախազն էլ է ուզում, որ Ռոբերտ Քոչարյանը վերադառնա ՔԿՀ, քրեակատարողական ծառայությունն էլ է նման միջնորդություն ներկայացնում։ Ստացվում է՝ իրականում նրանց նպատակն է, որ պարոն Քոչարյանը հնարավորին չափ գտնվի վատ վիճակում։ Պարզապես նրանց առաջ խնդիր է դրված, որ նրա դեպքում վարույթն իրականացվի ամենավատ տարբերակով, պետք է անպայման կալանավայրում գտնի, ոչ թե հիվանդանոցում։

Մենք շատ լավ հասկանում ենք, որ հրահանգը գալիս է անմիջապես վարչապետից, այն պայմանավորված է վարչապետի վրեժխնդրության նկատառումներով։ Այս հանգամանքը ևս մեկ անգամ ապացույցում է այն, ինչ մենք ասել ենք։ Սա ուղղակի ցուցում է վարչապետի կողմից՝ պարոն Քոչարյանի նկատմամբ անել այնքան վատություն, ինչքան հնարավոր է»,-ասաց Ալումյանը։