Ես այն մարդկանցից եմ, որ սա համարում են սահմանադրական կարգի տապալման գործընթաց: Ես համարում եմ, որ այն ինչ տեղի է ունեցել սկսած 2019 թվականի հունիսի 20-ից մինչև այսօր ներառյալ, սահմանադրական կարգի տապալման մի ամբողջ գործընթաց էր՝ բազմաթիվ արարներով: Իսկ այս վերջին արարն ամենակոպիտն էր, ամենաառերևույթն էր ու ամենաերևացողը: Այս մասին ՍԴ-ի մոտ լրագրողների հետ զրույցում հայտարարեց իրավապաշտպան Ռուբեն Մելիքյանը, ում խոսքերով, ՀՀ վարչապետը հիմա էլ իրեն իրավունք է վերապահում օրենքներ մեկնաբանել ու ի լուր աշխարհի հայտարարություններ է անում:

Մելիքյանի խոսքերով, ՍԴ-ն եղավ այն ինստիտուտը, որն իր սկզբունքայնության, աշխատանքի շնորհիվ բոլորիս հասկանալու հնարավորություն տվեց, դարձավ Աստվածաշնչյան փորձության քարը. «Հնարավորություն տվեց հասկանալ, թե մենք ում հետ գործ ունենք, արդյո՞ք մենք ունենք պետության գլուխ, հանրապետության նախագահ, թե մարդ, ով պատրաստ է գիշերվա կեսին լինել «Արտուշ պապիկ», քանի խորհրդարանական ընդդիմադիր ուժ ունենք: Այս տեսանկյունից պետք է շնորհակալություն հայտնենք Սահմանադրական դատարանին»:

Աղբյուրը՝ analitik.am