Ես շարունակելու եմ աշխատել, շարունակելու եմ իմ գործունեությունը, այս մասին, այսօր Սահմանադրական դատարանի մոտ լրագրողների հետ զրույցում նշեց ՍԴ անդամ Ալվինա Գյուլումյանը, ում լիազորությունները, ըստ սահմանադրական փոփոխությունների, այսօրվանից դադարել են:

Հարցին՝ մտահոգություն չունի արդյո՞ք, որ իրեն կարող են ուժով հեռացնել, ինչպե՞ս է կարգավորվում հարցը, Ալվինա Գյուլումյանը նշեց, որ հարցը կարգավորվում է որոշակիորեն սահմանված կարգով:

«Որևէ մեկը դեռևս չի արձանագրել, որ իմ լիազորություններն ավարտված են: Սահմանադրական նորմն ընդունվել է, սակայն գոյություն ունի «Սահմանադրական դատարանի մասին» օրենք, որով կարգավորվում է ՍԴ կազմակերպումն ու գործունեությունը: Այս պարագայում, օրենքի ուժով մենք դեռևս շարունակում ենք աշխատել:

Դատարանում, երբ որևէ մեկի լիազորությունները դադարել են, այդ մասին դատարանի նիստի արձանագրային, այսպես ասած, որոշում է ընդունվել, որով հաստատվել է տվյալ անձի լիազորությունների դադարման փաստը: Առայժմ այդպիսի փաստաթուղթ չկա: Իսկ հայտարարությունները ոչ իմ, որ էլ ձեր աշխատանքից ազատվելու հիմք չեն»,- ասաց նա:

Բացի դրանից, դատավորի խոսքով, պետք է լինի նաև իրավական հիմք, որ այդ որոշումը վերաբերում է նաև իրեն, իսկ հայտարարություններն այդպիսի հիմք չեն:

Մանրամասները՝ tert.am-ի տեսանյութում: