««Ժողովուրդ» օրաթերթի տեղեկություններով՝ այս օրերին Սահմանադրական դատարանում անորոշ վիճակ է: Այլ կերպ ասած, ՍԴ նախկին նախագահ Հրայր Թովմասյանի՝ արձակուրդ գնալուց հետո կառույցում բարձիթողի վիճակ է ստեղծվել, և այդպես էլ անհասկանալի է, թե ի վերջո այժմ ով ինչ աշխատանք է կատարում: Նախ՝ ինչպես հայտնի է, Ազգային ժողովի կողմից ընդունված սահմանադրական փոփոխությունների համաձայն՝ Հրայր Թովմասյանն այլևս Սահմանադրական դատարանի նախագահ չէ, իսկ Ալվինա Գյուլումյանի, Հրանտ Նազարյանի և Ֆելիքս Թոխյանի լիազորությունները դադարեցվել են:

Միևնույն ժամանակ, հունիսի 26-ին Հրայր Թովմասյանը մեկնեց արձակուրդ՝ դեռ որպես ՍԴ նախագահ, և իր որոշմամբ նախագահի պարտականությունները պետք է կատարեր Ալվինա Գյուլումյանը, ում լիազորությունները, ինչպես նշեցինք, դադարեցվել են: Դրան զուգահեռ էլ ԱԺ նախագահ Արարատ Միրզոյանն էլ հունիսի 27-ին հանդիպեց Աշոտ Խաչատրյանին, ով ՍԴ-ում մնացած դատավորներից ամենաավագն է, և ինքը պետք է կատարի ՍԴ նախագահի պարտականությունները: Եվ ստացվում է, որ այժմ Սահմանադրական դատարանի 9 անդամներից միայն 4-ն են աշխատանքի հաճախում, քանի որ Արևիկ Պետրոսյանն էլ Հրայր Թովմասյանի հետ նույն օրն էր արձակուրդ գնացել: Եվ այս իրավիճակում Սահմանադրական դատարանն այդպես էլ չի կարողանում նիստեր անել, որոշումներ կայացնել, այլ կերպ ասած, կառույցում բարձիթողի վիճակ է:

ArmLur.am-ը փորձեց Սահմանադրական դատարանի աշխատակազմի ղեկավար Էդգար Ղազարյանից հասկանալ՝ ինչ իրավիճակ է Սահմանադրական դատարանում: Նախ՝ նա նշեց, թե Հրայր Թովմասյանը օգտագործելու է իր տարեկան արձակուրդը, որը կազմում է 30 օր, սակայն ունի նաև չօգտագործված օրեր և կարող է ավելի երկար արձակուրդում մնալ: ՍԴ աշխատակազմի ղեկավարը նաև ընդգծեց, որ Աշոտ Խաչատրյանն ասել է, որ չի ստանձնի իր պարտականությունները, քանի դեռ օրենքում փոփոխություններ չեն արվել:

Այստեղ էլ ընդգծենք, որ ԱԺ-ի կողմից ընդունված «Սահմանադրական դատարանի մասին» օրենքը ՀՀ նախագահ Արմեն Սարգսյանն այդպես էլ չի ստորագրել, և այն ուժի մեջ կարող է մտնել արդեն հուլիսի 22-ից հետո, երբ օրենքով Արմեն Սարգսյանին ստորագրելու համար տրված ժամկետը կավարտվի: Արդեն այդ ժամկետի ավարտից հետո՝ արդեն հինգօրյա ընթացքում, օրենքը կարող է ստորագրել ԱԺ նախագահը, և այն կմտնի ուժի մեջ: Ստացվում է՝ Սահմանադրական դատարանը փաստացի ո’չ նախագահ ունի, ո’չ նախագահի պարտականությունները կատարող անձ»,-գրում է թերթը:

Նյութն ամբողջությամբ կարդացեք թերթի այսօրվա համարում։