Իր հերթին Սեյրան Օհանյանի պաշտպան Կարեն Մեժլումյանը միջնորդել է որպես վկա դատարան հարցաքննության հրավիրել ԱԺ նախկին նախագահ Հովիկ Աբրահամյանին և նախկին պատգամավորներ Դավիթ Հարությունյանին, Արմեն Ռուստամյանին, Ավետ Ադոնցին, Արծրունի Աղաջանյանին, պարզելու համար՝ 300․1 հոդվածի փոփոխություններն արդյո՞ք կապված էին հենց 300 հոդվածի իրավական որոշակիություն չունենալու հետ։

Ըստ պաշտպանական կողմի՝ առաջադրված մեղադրանքի մեջ նշվում է, իբր 2008 թ․ նախագահական ընտրությունների հետ կապված վեճի քննարկման ժամանակ ՍԴ դատավորների վրա ճնշում է գործադրվել։ Հաշվի առնելով այս հանգամանքը, անհրաժեշտություն է առաջանում առաջին հերթին հարցաքննել ՍԴ դատավորներին, մինչդեռ նախաքննություն իրականացնող մարմինը հարցաքննել է ՍԴ-ի տեխնիկական անձնակազմին:

Դատախազներն ու տուժող կողմի ներկայացուցիչները դեմ արտահայտվեցին, նշելով, որ տվյալ միջնորդությունը պաշտպանները կարող են ներկայացնել հետագայում, քանի որ այժմ գործը չի գտնվում ապացուցյների հետազոտման փուլում։

Պաշտպան Հովհաննես Խուդոյանը նշեց, որ միջնորդություններում հիշատակված անձինք տարիքով են և հնարավոր է, որ մի քանի տարի անց նրանք այլևս չեն կարող ներկայանալ դատարան։ Խուդոյանը հայտարարեց, որ դատարանն իր այս գործողություններով նպաստում է, որպեսզի այս գործով ամբողջական քննություն չկատարվի։

Իր հերթին պաշտպան Կարեն Մեժլումյանը կարծիք հայտնեց, որ սույն գործով վարույթը պետք է կասեցվի, մինչև դատավորների վեթինգի ավարտը, որովհետև մտավախություն կա, որ որևէ դատավոր, ով կարող է այս միջնորդությունները լուծել կամ օբյեկտիվ ու բազմակողմանի քննություն իրականացնել, կընկնի վեթինգի բացասական հետևանքների տակ։

Դատարանը մերժեց դատախազներին բացարկ հայտնելու միջնորդությունը

Երևանի ընդհանուր իրավասության դատարանը` դատավոր Աննա Դանիբեկյանի նախագահությամբ, մերժեց Մարտի 1-ի գործով տուժող Սերգեյ Եղիազարյանի ներկայացուցիչ Էդուարդ Ասլանյանի՝ մեղադրանքը պաշտպանող դատախազներին բացարկ հայտնելու միջնորդությունը։ Որոշումը ենթակա չէ բողոքարկման։

Սահմանադրական կարգի ենթադրյալ տապալման գործով այսօրվա դատական նիստին Ասլանյանը հայտարարեց, որ մեղադրանքի եզրակացության մեջ ներառված չեն 2008թ մարտի 1-ի դեպքերի վերաբերյալ մի շարք փաստաթղթեր և ապացույցներ, այդ թվում՝ Եղիազարյանին տուժող ճանաչելու մասին որոշումը։ Ներկայացուցչի խոսքով՝ փաստաթղթերի բացակայության պատճառով տուժողը նույնիսկ զրկվել է աջակցություն ստանալու հնարավորությունից, ինչի մեղավորները նախաքննության ընթացքում վերահսկողություն իրականացրած դատախազներն են։ Ասլանյանի խոսքով՝ մեղադրող կողմը ոչ թե պաշտպանում է տուժող կողմի շահերը, այլ մանիպուլացնում է դրանք։