«ՀՀ բնակչության առնվազն 1/3-ը և 60 տոկոսը կենտրոնացած են երևանում, իսկ Կառավարությունը հայտարարում է, որ Երևանն է դարձել համաճարակի բույնը։ Իսկ հակառակ այս հաստատումներին Երևանի քաղաքապետը և քաղաքապետարանը որևէ կապ չունեն բոլոր այն որոշումների հետ, որոնք կայացվում են հակահամաճարակային ճգնաժամի դեմ։ Եթե համաճարակի բույնը Երևանն է, ապա Երևանի առողջապահական խնդիրները նաև Երևանի քաղաքապետարանի խնդիրներն են»,-լրագրողների հետ հանդիպմանն այսօր ասաց ՀՅԴ Երևանի քաղաքային կոմիտեի անդամ Ժիրայր Պեոճեքյանը։

Բանախոսի դիտարկմամբ, կառավարության կողմից հակահամաճարակային միջոցների դեմ պայքարի շրջանակում կայացրած որոշումներում Երևանի քաղաքապետարանն ընդհանրապես գոյություն չունի․ «Քաղաքի ախտահանումը պատշաճ ձևով չկազմակերպվեց։ Նույնիսկ այն շենքերում, որտեղ կային վարակված մարդիկ, կամ մահեր արձանագրվեցին, ախտահանման գործընթաց չկազմակերպվեց։ Մենք ունենք քաղաքացիների տվյալներ, որոնք օրեր շարունակ զանգում էին քաղաքապետարան, համատիրություններ, բայց ոչ ոք չէր գնում այդ տարածքները ախտահանելու։ Իսկ 3 օր հետո էլ, երբ գնում էին, արդեն վարաքվողը վարաքվել էր»,-արձանագրեց Ժ․ Պեոճեքյանը և հավելեց․ «Առողջապահության նախարարությունը քարտեզներ հրապարակեց, թե որ վարչական տարածքում և որտեղ վարակված մարդիկ կան, բայց համայնքապետարանները այդ քարտեզները չեն ստացել, որպեսզի գնան հասցեներով ախտահանեն։ Քաղաքապետարանն ու քաղաքապետը փոխանակ հրապարակի վրա լինեն, ինչպես ողջ աշխարհում, բոլոր քաղաքապետերն իրենց վրա վերցրեցին կորոնավիրուսի խնդիրների լուծման պատասխանատվությունը, իսկ մեր պարագայում՝ մեր քաղաքապետը բացակայում էր քաղաքի առօրյայից՝ մի տեղ ինքնամեկուսացված, թողել է, որ երևանցին իր «յուղով տապակվի»։ Համավարակը ողջ աշխարհում կրկին ահագնանում է, մենք չգիտենք, թե Հայաստանում ինչ է սպասվում աշնանը, չգիտենք, թե որքան գումար է հարկավոր լինելու պատվաստանյութեր ձեռք բերելու համար, իսկ քաղաքապետարանի անձնակազմը, քաղաքապետի հետ պետք է այս ճակատամարտի «առաջին գծում», լինեին և տեր կանգնեին իրենց պարտավորություններին և պատասխանատվությունը չգցեին ժողովրդի, քաղաքացու, երևանցու վրա»։

Ըստ բանախոսի, տպավորություն է ստեղծվում, որ այս պայմաններում, երբ մարդիկ տարբերակ չունեն իրենց բողքի ձայնը բարձրացնելու, Կառավարությունը, իշխանությունը մեկը մյուսի հետևից որոշումներ է կայացնում և օրենքներ ընդունում․ «Քաղաքացին, այդ խնդրահարույց որոշումների դեմ իր բողոքի ձայնը բարձրացնելու տարբերակ չունի, բայց փոխարենը Կառավարությունը անցկացնում է այդ որոշումներն ու երևանցուն կանգնեցնում փաստի առաջ»,-ասում է Ժ․ Պեոճեքյանն ու թվարկում․ «Ֆիրդուսի թաղամասի որոշումը դրա մի օրինակն է, Մաշտոցի պուրակի սրճարանը, Նորքի IT-ները վաճառքի հանելը, և այլ նման որոշումներ, որոնք կարող ենք դեռ երկար թվարկել, որոնք հանրային քննարկման, երևանցու տեսակետը ստանալու կարիք ունեն։ Այդ որոշումների արդյունքում կան հարցականներ, իսկ մի քանի շաբաթ հետո կանգնելու ենք փաստի առաջ։ Ավելին, վիրավորականն այն է, որ այս բոլոր շինարարական խնդիրների հետ կապված, երբ մարդիկ բողոքի ձայն են բարձրացնում, Երևան քաղաքի գլխավոր ճարտարապետը, որի անձի հանդեպ, արվեստի իմաստով մեծ հարգանք ունենք, երևանցու մասին խոսելիս քաղաքացուն հավասարեցնում է շանտաժիստի, ավազակի հետ, որը պահանջներ է դնում, որպեսզի համաձայնի այս շենքի կառուցման կամ չկառուցման հարցում»։

Անդրադառնալով Երևան քաղաքի հիմնախնդիրներին ու քաղաքապետարանում առկա կառավարման ճգնաժամին Ժ․ Պեոճեքյանը վստահեցրեց․ «Խիստ մտահոգված ենք Երևանով, այս մասին մենք դեռ մեկ տարի առաջ էինք մեր մտահոգությունն արտահայտել քաղաքապետարանի դիմաց՝ դեղին քարտերի միջոցառում կազմակերպելով, բազմաթիվ առիթներով, հարցազրույցներով ու մամլո ասուլիսներով։ Բայց, մեր մեկնած ձեռքը մնացել է օդի մեջ, լսող չկա, ո՛չ մեր քննադատություններին արձագանքող կա, ո՛չ էլ՝ մեր առաջարկները լսող»,-մտահոգված ասաց բանախոսն ու դիտարկեց, որ այս մամլո ասուլիսով փորձում են իրենց մտահոգությունները փոխանցել բոլոր երևանցիներին։

Բանախոսը նաև հավելեց, որ Երևանի զարգացման ռազմավարական ծրագրի տեսլականի բացակայության խնդիր ունենք։

Մանրամասները՝ տեսանյութում։