Իշխանափոխությունից հետո, երբ նոր իշխանությունների իրավապահ մարմինները անցան ակտիվ գործողությունների և հաճախ ստուգումներ էին իրականացնում նախկին իշխանությունների ներկայացուցիչների առանձնատներում, մամուլում հայտնվեցին տեղեկություններ, որ ստուգված առանձնատներից ԱԱԾ-ն մեծ քանակությամբ ոսկի է առգրավել։

«Ժամանակ» օրաթերթը այդ օրերին մասնավորապես գրել էր.«Տարբեր տեղեկություններ են ստացվում ԱԱԾ հատուկ գործողությունների արդյունքում նախկին պաշտոնյաներին պատկանող բնակարաններից և տարածքներից ոսկու ձուլակտորների հայտնաբերման մասին: Խոսքը մոտ 200 կգ ոսկու մասին է, որից միայն 50 կգ-ը պատկանել է Մանվել Գրիգորյանին»:

Հետաքրքիր է, որ Ազգային անվտանգության ծառայությունը որևէ կերպ չհերքեց մամուլում հայտնված այս տեղեկատվությունը։ Անսպասելի լռություն էր իշխանափոխությունից հետո հրապարակայնության դրոշակակակիր ԱԱԾ-ի կողմից։

Եվ ահա ամիսներ անց հարց է առաջանում, թե ի՞նչ է եղել 200 կիլոգրամ ոսկին։ Իհարկե, իշխանությունները կարող են ասել, որ իրենք ոչ մի ոսկի էլ չեն առգրավել, այդ դեպքում հարց է առաջանում, եթե չեն առգրավել, ապա ինչու՞ են լռել մի քանի ամիս։ Խոսքն այստեղ մի քանի տասնյակ միլիոն դոլարի մասին է, ու իրավապահ մարմինները իրավունք չունեն լռելու։