Ռազմական գիտությունների դոկտոր Կոնստանտին Սիվկովը «ՌԻԱ Նովոստի» գործակալությանը տված հարցազրույցում հայտնել է, որ Ադրբեջանին Անկարայի աջակցությունը, որը Լեռնային Ղարաբաղում հանգեցրել է բռնության սրման, չափազանց անպատասխանատու քայլ է: Ռազմական փորձագետն աշխարհաքաղաքական բոլոր խաղացողների հետ կռվի մեջ մտած Ռեջեփ Թայիփ Էրդողանի այս քայլը «քաղաքական ինքնասպանություն» է որակել:

Անդրադառնալով Ասադի հայտարարությանն առ այն, որ Թուրքիան Սիրիայից և այլ երկրներից ահաբեկիչների է ներգրավել Լեռնային Ղարաբաղի հակամարտությանը և դրա վերսկսման նոր փուլի գլխավոր նախաձեռնողը հենց Էրդողանն է՝ Սիվկովը նշել է. «Իհարկե, Լեռնային Ղարաբաղում հենց Էրդողանն է պատերազմի նախաձեռնող եղել: Այս տարածաշրջանում չափազանց երկար ժամանակ խաղաղություն էր տիրում, անցած մի քանի տարվա ընթացքում ոչինչ չի փոխվել, և պատահմամբ ռազմական գործողություններ են սկսվում: Իր հայտարարություններով Թուրքիան հակամարտության պատմության մեջ առաջին անգամ ԱՄՆ-ի, Ֆրանսիայի և Ռուսաստանի դեմ է հանդես գալիս՝ աշխարհի տարբեր մասերում միաժամանակ մասնակցելով մի քանի հակամարտություններ. սա խելագարություն և քաղաքական ինքնասպանություն է»,-հայտարարել է Սիվկովը:

Գործակալության զրուցակիցը նշել է նաև, որ Թուրքիան՝ որպես տարածաշրջանային գերտերություն, չպետք է մոռանա, որ միայն մեծ «ուժային կենտրոններից» մեկի աջակցությամբ կարող է ակտիվ արտաքին քաղաքականություն վարել, բայց Ղարաբաղում ագրեսիա հրահրելով՝ Անկարան Մոսկվայի աջակցությունը ստանալու հանրավորությունը ռիսկի տակ է դնում:

«Ներկայիս Ֆրանսիան ինչպիսի խնդիրներ էլ որ ունենա, միջուկային գերտերություն է և ՆԱՏՕ-ի կազմում է: Ֆրանսիական կողմի հետ հարաբերություններն էլ վատթարացել են Հունաստանի հետ վեճերի պատճառով: ԱՄՆ-ի հետ Թուրքիայի հակամարտությունն այնքան սրված է, որ թվում է՝ 2016 թվականին Թուրքիայում հեղաշրջում կատարելու փորձի հետևում ամերիկացիներն էին: Միակ երկիրը, որը կարող էր աջակցել Անկարային, Մոսկվան է, բայց Ղարաբաղում Թուրքիայի գործողությունները, ըստ էության, մեր դեմ ուղղված պատերազմ են»,-ընդգծել է փորձագետը:

Աղբյուրը` tert.am