ՌԴ Պետդումայի ԱՊՀ գործերով կոմիտեի նախագահի տեղակալ Կոնստանտին Զատուլինը խորհուրդ է տվել Թուրքիայի նախագահ Ռեջեփ Թայիփ Էրդողանին՝ հիշել Էնվեր փաշայի ճակատագիրը:

Դեկտեմբերի 10-ին Բաքվում կայացած շքերթի ընթացքում Ադրբեջանի նախագահ Իլհամ Ալիևը հայտարարել էր, թե «Երևանը, Զանգեզուրը և Սևանը Ադրբեջանի պատմական հողերն են», իսկ Թուրքիայի առաջնորդ Ռեջեփ Թայիփ Էրդողանը հիշատակել էր Էնվեր փաշային (1915 թ. Հայոց ցեղասպանության կազմակերպիչներից մեկը): Ալիևը նշել էր, որ պատերազմը դեռ չի ավարտվել, տարածաշրջանում նոր դարաշրջան է սկսվելու, «եթե Հայաստանի ժողովուրդը դասեր քաղի Ղարաբաղում կատարվածից»:

«Շատ յուրօրինակ պատմական հիշողությունը պարոն Էրդողանին թույլ է տալիս հիշել Էնվեր փաշային՝ չհիշելով, թե ինչ է նա արել հայերի հետ Առաջին համաշխարհային պատերազմի ընթացքում կամ ինչպիսի ավարտ է ունեցել: Ես խորհուրդ եմ տալիս պարոն Էրդողանին՝ հիշել դա»,-ասել է նա «Նովոստի-Արմենիա» գործակալությանը տված հարցազրույցում:

Անդրադառնալով Բաքվում կայացած զորահանդեսում Ալիևի հայտարարություններին՝ քաղաքական գործիչը նշել է, որ «ՄԳԻՄՕ-ի այս շրջանավարտը շատ յուրովի է ընկալում պատմությունը»:

«Սա ինձ նույնիսկ կասկածի տեղիք է տալիս, որ ՄԳԻՄՕ-ում պատմության դասավանդման հետ կապված ամեն ինչ կարգին է: Ես ինքս ավարտել եմ պատմության ֆակուլտետը, և ես երբեք չեմ լսել, որ մեր երկրում որևէ մեկը մեկնաբանի պատմությունն այնպես, թե Երևանը հինավուրց ադրբեջանական հող է: Որքանով ես պատմություն գիտեմ, ադրբեջանցիները իրենց անունն օրինականացրել են միայն 20-րդ դարում: Ռուսական կայսրությունում մարդահամարի ժամանակ նրանց անվանում էին թուրք-թաթարներ: Դա կարելի է վերագրել ռուս գաղութարարների ապաշնորհությանը»,-շեշտել է նա:

Այս առնչությամբ Զատուլինը նշել է, որ երկրի նախագահի մակարդակի ղեկավարին չի թույլատրվում նման հայտարարություններ անել:

«Այս հայտարարությունները հանգեցնում են ամբողջ աշխարհի, ոչ միայն ՌԴ-ի, մտահոգությանը Կովկասում Թուրքիայի և Ադրբեջանի միջև դաշինքի վերաբերյալ»,-ասել է նա:

Աղբյուրը՝ yerevan.today