ԱԺ ՀՀԿ խմբակցության պատգամավոր Գագիկ Մելիքյանը լրագրողների հետ հանդիպման ժամանակ անդրադառնալով Անջեյ Կասպրչիկի հարցազրույցին՝ նշել է, որ նման լուրջ հայտարարությունը ոչ միայն բխում է հայկական կողմի, այլև միջազգային հանրության շահերից ու միջազգային իրավունքից։ Բանախոսը հատկապես առանձնացրել է Կասպրչիկի հարցազրույցի այն հատվածը, որտեղ նա ասում է, թե մինչև վերջնական համաձայնագրի ստորագրումը Լեռնային Ղարաբաղի կարգավիճակը չի կարող ցածր լինել ներկա կարգավիճակից, և դրան պետք է հետևի նաև միջազգային հանրության կողմից Լեռնային Ղարաբաղի ճանաչումը որպես պետություն։

Նրա կարծիքով բանակցությունները դեռ երկար ժամանակ կշարունակվեն։

–Մենք միշտ պատրաստ ենք եղել պատերազմի, և այն հանգամանքը, որ Հայաստանի Հանրապետությունը և Լեռնային Ղարաբաղի Հանրապետությունը պատրաստ են նույնիսկ Ադրբեջանի կողմից սանձազերծված պատերազմին պատերազմով պատասխանելու, Ադրբեջանի՝ նման քայլի չդիմելու այսօրվա հիմնական գրավականն է,–ընդգծել է բանախոսը։

Ինչ վերաբերում է հունիսի 25–ին Կազանում նախատեսված Հայաստանի, Ռուսաստանի և Ադրբեջանի նախագահների հանդիպմանը, Գ. Մելիքյանը կարծիք է հայտնել, որ դրական որոշակի առաջընթաց կգրանցվի՝ հավելելով, որ ցանկացած քայլ պետք է համաձայնեցվի ԼՂՀ իշխանությունների հետ։

7or.am