Լեռնային Ղարաբաղի հակամարտության խաղաղ կարգավորման բանակցություններում հնարավորություն կա գալու լուրջ պայմանավորվածությունների։ Այս մասին այսօր լրագրողներին հայտնել է Ադրբեջանում Ռուսաստանի դեսպան Վլադիմիր Դորոխինը։

«Ռուսական կողմը, որպես ԵԱՀԿ Մինսկի խմբի համանախագահող երկիր, ակտիվ ջանքեր է ներդնում՝ լուծելու Լեռնային Ղարաբաղի հակամարտության խնդիրը։ Միջազգային հանրության ջանքերի շնորհիվ այժմ հնարավորություն կա գալու լուրջ պայմանավորվածությունների, և Ռուսաստանը կանի ամեն ինչ, որ այդ հնարավորությունն օգտագործվի»,–ասել է Դորոխինը։

Նա նշել է, որ Ռուսաստանը բանակցություններին մասնակցում է ամենաբարձր մակարդակով։

«Ինչպես ընդգծել է նախագահ Մեդվեդևը, մենք բարոյական պատասխանատվություն ենք զգում այս հարցում, քանի որ ապրել ենք մեկ երկրում»,–ասել է ՌԴ դեսպանը։

Վ. Դորոխինը հույս է հայտնել, որ Կազանում նախագահների հանդիպման ժամանակ դրական արդյունք կգրանցվի։