Թութանհամոն փարավոնի մումիայի ուսումնասիրության շրջանակում հետազոտողները նրա մարմնի համակարգչային տոմոգրաֆիա են անցկացրել: Հետազոտության նպատակն է եղել պարզել, թե ինչպես են երկարատև մոտ արյունակցական ամուսնություններն ազդել Հին Եգիպտոսի պատանի տիրակալի առողջության վրա, հայտնում է Express պորտալը։

Դատական կենսահնագետ դոկտոր Քերոլին Ռենդոն և նրա թիմը համակարգչային տոմոգրաֆիայի միջոցով ստեղծել են փարավոնի մարմնի թվային կրկնօրինակը՝ կենտրոնանալով որոշակի հատվածների վրա՝ ինբրիդինգի ապացույցներ գտնելու համար: Ըստ հետազոտողների՝ այս մեթոդը թույլ է տալիս տեսնել այն մանրամասները, որոնք անհնարին կլիներ տեսնել նույնիսկ տեսողական մանրակրկիտ զննման դեպքում։

Վերլուծելով տոմոգրաֆիայի արդյունքները՝ գիտնականները հատկապես նշել են երիտասարդ փարավոնի գանգի արտասովոր ձևը։

«Նա շատ-շատ երկար գանգ ունի՝ համեմատած մարդկանց մեծամասնության հետ: Ժամանակակից մարդկանց գանգն ավելի կլոր է կամ երկարավուն»,-ասել է բժիշկ Ռենդոն:

Գիտնականները չեն բացառում, որ գանգի անսովոր ձևը ժառանգական հատկանիշ է եղել հին եգիպտական կառավարիչների ընտանիքի համար։ Հարազատների միջև ամուսնական կապերի հետևանքով ռեցեսիվ հատկանիշները ամրապնդվել ու ժառանգաբար փոխանցվել են, դրանցից մեկը կրանիոսինոստոզն է։ Սա երեխայի գանգի ոսկորները միացնող մեկ կամ մի քանի կարերի վաղաժամ սերտաճումն է, որի հետևանքով գլխի անսովոր ձև է ստացվում:

Սակայն գիտնականները փարավոնի ոսկորներում երկարատև արյունապղծության այլ նշաններ չեն հայտնաբերել: Դրա նշաններից մեկը ատամնաշարի պաթոլոգիական փոփոխություններն են, որոնք Թութանհամոնի մոտ չեն հայտնաբերվել։

Աղբյուրը՝ news.am