Անկարայում ավարտվել է Թուրքիայի և Ռուսաստանի արտաքին գործերի նախարարներ Մևլութ Չավուշօղլուի և Սերգեյ Լավրովի հանդիպումը, հայտնում է ՏԱՍՍ գործակալությունը։

Հանդիպմանը հաջորդած մամուլի ասուլիսում Լավրովն ասել է, որ Չավուշօղլուի հետ քննարկել է Ռուսաստանի Դաշնության և Թուրքիայի միջև ամենաբարձր մակարդակով հանդիպման նախապատրաստական աշխատանքները։

Լավրովն «օգտակար» է համարել Անկարայում Չավուշօղլուի հետ հանդիպումը։

***

Թուրքիան իրատեսական է համարում Ուկրաինայից հացահատիկի արտահանման համար անվտանգ միջանցք ստեղծելու գաղափարը։ Այս մասին չորեքշաբթի հայտարարել է Թուրքիայի արտգործնախարար Մևլութ Չավուշօղլուն՝ Անկարայում իր ռուս գործընկեր Սերգեյ Լավրովի հետ բանակցություններից հետո կայացած մամուլի ասուլիսում, գրում է ՏԱՍՍ-ը։

«Մենք խոսում ենք մի մեխանիզմի մասին, որը կարող է ստեղծվել ՄԱԿ-ի, Ռուսաստանի, Ուկրաինայի և Թուրքիայի միջև: Մենք իրատեսական ենք համարում այդ ծրագիրը: Պետք է քննարկել նավերի անվտանգ երթևեկության միջոցները»,-ընդգծել է նա։

Նրա խոսքով՝ Անկարան պատրաստ է Ստամբուլում հանդիպում կազմակերպել Ռուսաստանի Դաշնության, Ուկրաինայի, Թուրքիայի և ՄԱԿ-ի միջև՝ ուկրաինական նավահանգիստներից հացահատիկի արտահանման վերաբերյալ։

Նա նաև ասել է, որ Թուրքիան ողջամիտ է համարում ՄԱԿ-ի առաջարկը, որը վերաբերում է հացահատիկի արտահանման մեխանիզմին Ռուսաստանի Դաշնության մասնակցությանը։

Աղբյուրը` tert.am