Քիչ առաջ ստացա տեղեկություն, որ Վանաձորի ընտրված համայնքապետ, քաղբանտարկյալ Մամիկոն Ասլանյանին «Վարդաշեն» քրեակատարողական հիմնարկից տեղափոխում են քաղաքացիական հիվանդանոց:

Մամիկոն Ասլանյանի առողջական վիճակը կտրուկ վատացել է:

Արսեն Բաբայանի ֆեյսբուքյան էջից

***

Նա «Վարդաշեն» ՔԿՀ–ից է տեղափոխվել քաղաքացիական հիվանդանոց։

«Նախնական ախտորոշվել է ճնշման սուր տատանում, ինքնազգացողությունը դեռ չի կարգավորվել»,–նշեց Վարոսյանը։

Ավելի վաղ Ասլանյանի երկրորդ փաստաբանը` Ռուբեն Հակոբյանը Sputnik Արմենիային հայտնել էր, որ վերջին շրջանում պաշտպանյալը բողոքել է վատ ինքնազգացողությունից, մասնավորապես` բարձր ճնշումից ու սրտի աշխատանքից։

Հիշեցնենք, որ 2021 թվականի դեկտեմբերի 5-ին Վանաձորում առավելագույն ձայներ էր ստացել «Մամիկոն Ասլանյան» դաշինքը: Դաշինքի օգտին քվեարկել էր 12 814 ընտրող (45%): Դեկտեմբերի 17-ին պետք է տեղի ունենար ընտրված ավագանու անդրանիկ նիստն ու համայնքի ղեկավարի ընտրությունը։ Բայց դրանից մեկ օր առաջ Մամիկոն Ասլանյանը ձերբակալվել, ապա կալանավորվել էր։

Նրան մեղադրանք է առաջադրվել պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։