Հադրութի շրջանի Խծաբերդ և Հին Թաղեր գյուղերի տարածքից անհասկանալի հանգամանքներում գերեվարված և առայսօր ադրբեջանական բանտերում գտնվող շիրակցիների հարազատները երեկ առավոտվանից Կառավարության շենքի մոտ նստացույց էին անում՝ պահանջելով վարչապետի հետ հանդիպում։

Գերիների հարազատներին Նիկոլ Փաշինյանի հետ հանդիպել օրվա ընթացքում այդպես էլ չի հաջողվել՝ չնայած վարչապետի աշխատակազմի ներկայացուցիչներից մեկի միջոցով փոխանցել էին իրենց պահանջը։

Իշխանությունների անգործությունից ջղայնացած շիրակցիները գիշերը ևս անց են կացրել Կառավարության շենքի մոտ։ Առավոտյան գերիների հարազատները թեև դադարեցրել են նստացույցը, բայց իրենց պահանջից չեն հրաժարվում։ Հայաստանի իշխանություններից պահանջում են գործուն քայլեր ձեռնարկել Բաքվի բանտերում ապօրինաբար պահվող հայ ռազմագերիներին անհապաղ վերադարձնելու համար։

Աղբյուրը՝ pastinfo.am