Հին եգիպտական հսկայական բուրգերը կանգնեցվել են Գիզայի հարթավայրում՝ գետի վտակների նավիգացիայի համար պիտանի դիրքի շնորհիվ։ Ինչպես նշվում է PNAS ամսագրի հոդվածում, նման բացահայտում են արել Ֆրանսիայի և Եգիպտոսի հնագետները։

Գիտնականները հայտնաբերել են առաջին ապացույցն այն բանին, որ հին թագավորության չորրորդ դինաստիայի փարավոնները Գիզայի սարահարթում բուրգեր են կառուցել հիմնականում այն բանի շնորհիվ, որ այստեղ է գտնվել Նեղոսի՝ նավիգացիայի համար հարմար վտակը: Նեղոսի նախկին վիճակի կոնֆիգուրացիան հասկանալու համար հետազոտողներին օգնել է ութ հազար տարվա ընթացքում կուտակված ծաղկափոշին:

Հին Եգիպտոսի բոլոր ամենամեծ բուրգերը գտնվում են Գիզայի հարթավայրում, որը Կահիրեից 25 կմ հեռավորության վրա է։ Նեղոսը գտնվում է 8 կմ հեռավորության վրա, ուստի մինչ այժմ գիտնականները լիովին չեն հասկացել, թե ինչպես են հին եգիպտացիները ավազաքարի, կրաքարի և գրանիտի շինանյութեր հասցրել բուրգերի կառուցման վայր: Առեղծվածը լուծել են Էքս-Մարսելի համալսարանի պրոֆեսոր Քրիստոֆ Մորանժը և նրա ղեկավարած մի խումբ գիտնականներ։

Նախկինում հնագետները «Քեուֆու ճյուղի»՝ Նեղոսի չոր վտակի գոյության հետքեր էին հայտնաբերել այսօրվա Գիզայի մոտ: Այն փաստի մասին, որ Նեղոսի վտակներն օգնել են եգիպտացիներին շինանյութեր մատակարարել, վկայում են նաև հին պապիրուսները։ Սակայն այժմ գիտնականները կարողացել են դա ապացուցել՝ վերլուծելով գետի նստվածքային ապարներում ծաղկափոշու կուտակումները: Փորձագետները վերակառուցել են Նեղոսի նավարկությունը Գիզայի մերձակայքում՝ այն բույսերի փոշու մասնիկներից, որոնք աճում են խոնավ վայրերում: Հաշվարկները ցույց են տվել, որ Նեղոսի կողային վտակներում ջրի բարձր մակարդակ է եղել մոտ վեց-հինգուկես հազար տարի առաջ, սակայն մ.թ.ա. III հազարամյակի կեսերին վտակները ծանծաղացել ու և անհետացել են:

Աղբյուրը՝ news.am