Այսօր արցախցին «վայելում է» ՀՀ իշխանությունների բերած «անվտանգությունը»՝ ադրբեջանցիների կողմից ամենօրյա սադրանքների և ահաբեկչության պայմաններում. ամեն վայրկյան մեր լուսացրած օրվա, ողջ մնալու համար շնորհակալություն ենք հայտնում Աստծուն, Aysor.am-ի թղթակցի հետ զրույցում ասաց Արցախի Հանրապետության խորհրդարանի «Արդարություն» խմբակցության պատգամավոր Մետաքսե Հակոբյանը` արձագանքելով ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ, ՔՊ-ական պատգամավոր Անդրանիկ Քոչարյանի մտքին, որ արցախցին պետք է ապրի Արցախում և ապրի անվտանգ։

«Ապրում ենք՝ չիմանալով, թե վաղը թշնամին մեր գլխին ինչ է բերելու։ Գուցե ՀՀ գործող իշխանությունները մտածում են, որ նախորդ 30 տարինե՞րն անվտանգ չէին։

Այժմ ստացվում է, որ Արցախն ուրիշ ոչ մի խնդիր չպետք է ունենա, քան պարզապես չմեռնելը՝ բառի բուն իմաստով։ Որովհետև միշտ ասում են՝ «Շնորհակալ եղեք, որ ուղղակի ֆիզիկապես չեք բնաջնջվում»։

Եվ դրա համար մտցրեցին իրենց խաղաղության օրակարգը, որի արդյունքում Արցախում բնակվող հայը պետք է լինի ադրբեջանցու ստրուկը, այսինքն՝ արցախահայությանն առավելագույնը թույլ կտան իր լեզվով խոսել, օգտագործել սեփական մշակույթը, այո՛, ես շեշտում եմ՝ օգտագործել և ուղղակի գոյատևել։

Ստացվում է, որ ամեն ինչ ավելի վատ է, քան եղել է մինչև 1988 թվականը։ Ահա այսքանով հանդերձ են ՀՀ իշխանություններն Արցախն անվտագ համարում»,-ասաց Մետաքսե Հակոբյանը՝ հավելելով, որ ինքն ուշադիր լսել է Անդրանիկ Քոչարյանը խոսքերը. վերջինս նույնիսկ չի կիրառել Արցախի Հանրապետություն եզրույթը՝ բավարարվելով ընդամենը «Արցախ» ասելով։

Արցախի ԱԺ պատգամավորը շեշտեց՝ երբ 90-ականներին հաղթանակ կերտած և միշտ հայրնիքի զինվորը մնացած անձը (նկատի ունի գեներալ-լեյտենանտ Միքայել Արզումանյանին՝ խմբ.) կարգվում է գլխավոր մեղավոր, ամեն ինչ առավել, քան պարզ է դառնում։

«Գլխավոր մեղավորին թողած՝ հիմա ինչ-որ մեղավորներ են նշանակում»,-ասաց մեր զրուցակիցը։