Անցյալ տարի Մեծ Բրիտանիայում ընկած երկնաքարը պարունակում է կարևոր տեղեկատվություն այն մասին, թե ինչպես են ձևավորվել Երկրի օվկիանոսները և կյանքը: Գլոսթերշիրի Վինչքոմբ շրջանում ճանապարհի վրա ընկած տիեզերական քարի ուսումնասիրությունը պարզել է, որ այն 11 տոկոս ջուր և 2 տոկոս ածխածին է պարունակում:

Փորձագետները հայտարարել են, որ աստղակերպերն առանցքային դեր են խաղացել «օվկիանոսների և վաղ Երկրի վրա կյանքի առաջացման համար անհրաժեշտ բաղադրիչների մատակարարման գործում», հաղորդում է PA Media-ն:

Վինչքոմբի երկնաքարը պատկանում է լեռնային ապարների հազվագյուտ դասին, որը հայտնի է որպես ածխածնային քոնդրիտներ։ Ածխածնային քոնդրիտները կազմում են Երկրի վրա հավաքված բոլոր երկնաքարերի մոտ 3 տոկոսը, և համարվում է, որ դրանք պարունակում են չորս միլիարդ տարի առաջ Արեգակնային համակարգի ձևավորման հետևանքով առաջացած անփոփոխ քիմիական նյութեր:

Երկնաքարի նմուշի վերլուծությունը բացահայտել է արտերկրային ջուր, որը, ըստ հետազոտողների, «փակված է հանքանյութերում, որոնք ձևավորվել են արեգակնային համակարգի վաղ փուլերում մայր աստղակերպի վրա հեղուկների և ապարների միջև քիմիական ռեակցիաների ժամանակ»:

Քիմիական վերլուծությունը ցույց է տվել, որ այս ջուրն իր բաղադրությամբ շատ նման է Երկրի ջրին: Նմուշներում հայտնաբերվել են նաև ամինաթթուներ՝ մոլեկուլներ, որոնք կյանքի առաջացման հիմնական բաղադրիչներից են:

Գիտնականները նշել են, որ երկնաքարի արագ արդյունահանումը թույլ է տվել փորձագետներին վերլուծել դրա բաղադրությունն իր սկզբնական տեսքով:

Աղբյուրը՝ news.am