Արագածոտնի մարզի Կարբի գյուղում երկու օր առաջ են հրաժեշտ տվել ողբերգական ավտովթարից զոհված 33-ամյա Վահե Հովհաննիսյանին, նրա կնոջը՝ 22-ամյա Արմինե Թորոսյանին և որդուն՝ 3 տարեկան Վաչե Հովհաննիսյանին։

NEWS.am-ին գյուղի բնակիչները պատմեցին, որ երիտասարդ ընտանիքը Պռոշյան գյուղում խնջույքից վերադառնալիս է եղել, երբ տեղի է ունեցել ողբերգական ավտովթարը։ Աշտարակ քաղաքը շրջանցող կամրջի վրա Վահեի վարած «VAZ-2106» մակնիշի ավտոմեքենան դուրս է եկել ճանապարհի երթևեկելի հատվածից, բախվել արգելապատնեշին, և մոտ 50 մետր արգելապատնեշի մեջ մխրճված առաջ ընթացել։

Վահեին տեղափոխել են Աշտարակի հիվանդանոց, կնոջն ու երեխային՝ Երևան՝ «Արմենիա» բժշկական կենտրոն։ Ընտանիքի բոլոր անդամները մահացել են։

«Համերաշխ ընտանիք էր, թերություն չունեին։ Ողբերգություն էր, ընտանիքը խորտակվեց, գնաց։ Մայրը մնաց մենակ, ցավալի է։ Վահեն իր համեստությամբ գյուղի հասարակության սերն ու հարգանքն էր վայելում»,-պատմեց համագյուղացիներից մեկը։

Գյուղի բնակիչները Հովհանիսյանների ընտանիքի ողբերգությունից ցնցված են, ասում են՝ համեստ տղա էր Վահեն, 4 տարի առաջ էր նիգավանցի Արմինեի հետ ամուսնացել։

Հարևանները պատմեցին, որ Վահեն կլարնետ էր նվագում, սովորեցրել էր նվագել նաև մանկահասակ որդուն, զբաղվում էր նաև այգեգործությամբ։

Քննչական կոմիտեն դեպքի առնչությամբ նախաձեռնել է քրեական վարույթ՝ ճանապարհային երթևեկության կանոնները խախտելու հոդվածով։