Scoot ավիաընկերության՝ Թայվանից Սինգապուր մեկնող չվերթի երկու ուղևոր տուժել է այն բանից հետո, երբ օդ բարձրանալուց առաջ ինքնաթիռի սրահում շարժական լիցքավորիչ է բռնկվել:

Ինչպես գրում է Daily Mail-ը, տագնապալի կադրերը, որոնք արվել են ուղևորներից մեկի հեռախոսով և տարածվել սոցիալական ցանցերում, ցույց են տալիս, թե ինչպես են բորտուղեկցորդուհիները փորձում հանգստացնել հուզված մարդկանց, մինչ կրակն ու ծուխը սկսում են խուճապ առաջացնել:

Հրդեհը սկսվել է այն ժամանակ, երբ արտաքին մարտկոցը (powerbank) բռնկվել է և արագ օդը լցրել ծխով՝ ստիպելով անձնակազմին տարհանել բոլոր 189 ուղևորներին:

Օդանավում գտնվող երկու մարդ ստացել է թեթև այրվածքներ, սակայն մնացած բոլոր ուղևորները անվնաս են տարհանվել: Տուժածներից մեկը վերալիցքավորող սարքի տերն էր. հայտնի է, որ սարքը գերտաքանալու հետևանքով պայթել է՝ հրդեհի պատճառ դառնալով։

Աղբյուրը` tert.am