Այս գիշեր Գեղարքունիքում վաշտի կեցավայր դարձած գյուղական տան պայթյունի հետևանքով զոհված 15 զինծառայողներից մեկը Արարատի մարզի Ուրցաձոր գյուղից էր։ 20-ամյա ժամկետային զինծառայող Տարոն Ղարիբյանի ծառայության ժամկետն ավարտվում էր 10 օրից։

«Իմ համագյուղացին է բանակում էսօրվա ողբերգական դեպքից զոհված տղաներից մեկը՝ Տարոնը,-Yerevan.Today-ին զոհված զինծառայող Տարոն Ղարիբյանի ու նրա ընտանիքի մասին մանրամասներ հայտնեց Ուրցաձորի նախկին գյուղապետ Ռաֆիկ Անդրեասյանը։ «Իմ մոտ է աշխատել հայրը, մեր գյուղապետարանի այգեպան Սեդրակի որդին էր։ էնքան պարզ ու հասարակ ընտանիքի երեխա էր, խաղաղասեր, բարի, պատասխանատու, հասուն էր ՝ իր տարիքի մեջ․ ի՞նչ ասեմ՝ հազար ափսոս։

Հողի մշակ ընտանիքից էր մեր զինվորը, ծառայության ժամկետը լրացել էր, խեղճերը անհամբեր սպասում էին, որ փետրվարին երրորդ զավակը բանկից պիտի փառքով-պատվով զորացրվեր, բայց չհասցրեց տուն վերադառնալ։ 50 տարեկան չկան ամուսիններով՝ սուգն առան նստեցին, ինչի՞ համար․․․ Գյուղում սուգ է իջել․․․։

Տարոնը Սեդրակի երրորդ որդին էր, երկու եղբայրները տարիներ առաջ են իրենց պարտքը տվել Հայրենիքին, ու հիմա մեկը դրսում է բնակվում։

Թող լույսի բաժին դառնան էդ մատղաշ երեխեքը»։