Հայաստանում ՀԱՊԿ առաքելությունը տեղակայելու Ռուսաստանի առաջարկը դեռևս արդիական է, և եթե Հայաստանը նախկինի պես հետաքրքրված է, առաքելությունը կարող է տեղակայվել մեկ-երկու օրվա ընթացքում։ Այս հայտարարությունն արել է ՌԴ արտգործնախարար Սերգեյ Լավրովը «Ռոսիա 24»–ին և ՌԻԱ Նովոստիին տված հարցազրույցում:

Արդյունքում՝ Երևանում կայացած գագաթնաժողովում պատրաստվեց համապատասխան որոշման տեքստը։ Բայց Երևանը, ՌԴ արտգործնախարարի խոսքով, ասաց, որ այն կընդունեն միայն այն դեպքում, եթե դրանում կտրականապես դատապարտվեն Ադրբեջանի գործողությունները։

«Սակայն բոլորը պատրաստ չէին դրան գնալ։ Եվ ոչ միայն այն պատճառով, որ ուզում էին ինչ-որ մեկին արդարացնել, մյուսին` չաջակցել: Պարզապես ղարաբաղյան այս ամբողջ պատերազմի պատմությունը ձգվում է տասնամյակների խորքը։ Եվ երբ երկար–երկար տարիներ Հայաստանը բռնազավթել էր Ադրբեջանի շրջակա 7 շրջանները, և հետո, երբ հուսահատվել էին հարցը քաղաքական ճանապարհով լուծելուց, Ռուսաստանն առաջարկում էր տարբերակներ, որոնք դեռ Հայաստանի նախկին ղեկավարությունն այնքան էլ դրական չէր ընդունում` ցանկանալով պահել այն տարածքները, որոնց երբեք չէր հավակնում։ Այստեղ, այնուամենայնիվ, այո՛, Ադրբեջանը վերադարձրեց իրեն պատկանող հողերը»,–ասել Է Լավրովը։

Այժմ, ըստ նրա, երբ Հայաստանն ու Ադրբեջանը Եվրամիության հետ ստորագրեցին խաղաղության պայմանագիր կնքելու պատրաստակամության մասին փաստաթուղթ` 1991 թվականի Ալմա Աթայի հռչակագրում նշված պայմաններով, Մոսկվան դժվարանում է որոշել հետագա քայլերը: Որովհետև Ալմա Աթայի հռչակագրում ասվում է, որ նորանկախ պետությունների միջև սահմանները կանցնեն Խորհրդային Միության, միութենական հանրապետությունների վարչական սահմաններով` ներառյալ Հայկական ԽՍՀ-ն և Ադրբեջանական ԽՍՀ-ն, որի կազմում էր Լեռնային Ղարաբաղի Ինքնավար Մարզը։ Այստեղ, այնուամենայնիվ, իրավիճակը բազմաշերտ է։

«Եվ այն փաստը, որ ՀԱՊԿ-ն այս բարդ իրավիճակում խաղաղապահ գործողության ծավալման պլան կազմեց, շատ կարևոր ձեռքբերում էր։ Այս առաջարկը դեռ ուժի մեջ է: Եվ եթե մեր հայ ընկերները, դաշնակիցները նախկինի պես շահագրգռված են դրանում, ապա այդ առաքելությունը կարող է ծավալվել 1-2 օրվա ընթացքում»,-ընդգծել է Լավրովը։

Աղբյուրը՝ armeniasputnik.am

***

ՌԴ ԱԳ նախարար Սերգեյ Լավրովը «Ռոսիա 24» հեռուստաալիքին և ՌԻԱ «Նովոստի» գործակալությանը տված հարցազրույցում, անդրադառնալով Արցախյան հակամարտությանը, նշել է, որ Հայաստանը տարիներ շարունակ «օկուպացրել էր» (չակերտները՝ Tert.am) Ադրբեջանի յոթ շրջանը:

«Հետո, երբ Ռուսաստանը հույսը կտրել է հարցի քաղաքական լուծումից, առաջարկել է բազմաթիվ տարբերակներ, սակայն ՀՀ դեռ նախորդ ղեկավարությունը դրանք այդքան էլ լավ, դրական չի ընդունել՝ ցանկանալով պահել այն տարածքները, որոնց երբեք էլ չի հավակնել: Եվ, այո, Ադրբեջանը վերադարձրեց «իրեն պատկանած» (չակերտները՝ Tert.am) հողերը: Հիմա, երբ երբ և՛ Հայաստանը, և՛ Ադրբեջանը, և՛ ԵՄ-ն ստորագրել են խաղաղության պայմանագիր ստորագրելու պատրաստակամության մասին պայմանագիր՝ 1991-ի դեկտեմբերին կնքված Ալմա-Աթայի հռչակագրի դրույթների հիման վրա, մեզ համար արդեն դժվար է կողմնորոշվել հետագա քայլերի առնչությամբ, քանի որ այդ հռչակագրում ասվում է, որ նորանկախ հանրապետությունների միջև սահմաններն անցնելու են ԽՍՀՄ վարչական սահմաններով.... իսկ Լեռնային Ղարաբաղի Ինքնավար Մարզը գտնվել է խորհրդային Ադրբեջանի կազմում: Այնպես որ այս պարագայում հարցը բազմաշերտ է»,-ասել է Լավրովը:

Աղբյուրը՝ tert.am