Վրաստանի խորհրդարանի շենքի մոտ բողոքի ակցիայի մի քանի մասնակիցներ տուժել են ոստիկանության ուժերի գործողություններից։

Բախումների ֆոնին պատգամավորներին խորհրդարանի շենքից տարհանել են ոստիկանության հսկողության ներքո։

Չնայած ընդդիմության պնդումներին, թե հանրահավաքը խաղաղ բնույթ է կրում, ներքին գործերի նախարարությունում հայտարարել են, որ ակցիան բռնի բնույթ է ստացել:

«Ուժայինները արցունքաբեր գազ և ջրցան մեքենաներ են կիրառել ակցիան ցրելու համար։ Տուժել են բողոքի ակցիայի մասնակիցները, լրագրողներն ու ոստիկանները»,-ասված է հաղորդագրության մեջ։

Վրաստանի ժողովրդական պաշտպան Լևան Իոսելիանին ոստիկաններին և ցուցարարներին կոչ է արել դուրս չգալ օրենքի շրջանակից:

Նշվում է, որ Վրաստանի նախագահ Սալոմե Զուրաբիշվիլին, որն այցով գտնվում է ԱՄՆ-ում, չեղարկել է նյույորքյան հանդիպումները և դիմել երկրի բնակչությանը: Նա աջակցություն է հայտնել ցուցարարներին՝ հայտարարելով, որ վետո կդնի «Օտարերկրյա գործակալների մասին» օրենքի վրա։