Հայաստանում Ֆրանսիայի արտակարգ և լիազոր դեսպան Անն Լույոն շուտով պաշտոնանկ կարվի։ Այս մասին բազմաթիվ սկանդալային հրապարակումներ կան «Թվիթեր» սոցիալական կայքում։ Տեղեկատվություն կա, որ դեսպանի պաշտոնանկությունն օրերի հարց է, և նույնիսկ հայտնի է արդեն նոր դեսպանի անունը՝ Օլիվիե Դեկոտինիե։ Այս պահին վերջինս զբաղեցնում է Էրբիլում (Իրաքյան Քուրդիստան) Ֆրանսիայի հյուպատոսի պաշտոնը։

Հայաստանում Ֆրանսիայի արտակարգ և լիազոր դեսպանի մոտալուտ պաշտոնանկության պատճառը կարող է լինել ֆրանսահայ ճանաչված լրագրող Լեո Նիկոլիանի հրապարակած HSBC բանկի փաստաթուղթը, որը պտտվում է թվիթերյան հարթակներում, և որից երևում է, որ դեսպան Անն Լույոյի հաշվին 2022 թվականի նոյեմբերի 25-ին 3 մլն 100 հազար ԱՄՆ դոլար գումար է նստել։ Ֆրանսիայի Եվրոպայի և արտաքին գործերի նախարար Կատրին Կոլոննայի՝ Հայաստան սպասվող այցի նախօրեին սա կարող է մեծ արձագանք ստանալ։ Ինչպես հայտնի է, Ֆրանսիայի ԱԳ նախարարը Երևանում կլինի ապրիլի վերջին։ Մեր հարցերին պատասխանելով, Լեո Նիկոլիանն ասաց, որ սկանդալային փաստաթուղթը ստացել է իր աղբյուրներից։ «Ֆրանսիայի արտակարգ և լիազոր դեսպանը բանկային հաշիվը գաղտնի է բացել։ Նա իրավունք չուներ նման հաշիվ ունենալ։ Միայն Ֆրանսիայում կարող էր ունենալ։ Բայց անգամ եթե ունի, ապա նա պարտավոր էր հայտարարագրել այդ հաշիվը։ Որտեղի՞ց դեսպանին այդ 3 մլն դոլարը։ 1 մլն-ն նա ստացել է «Վեոլիա ջուր» ընկերությունից, իսկ 2 մլն դոլարը՝ Ադրբեջանից»,-սենսացիոն բացահայտում է անում Լեո Նիկոլիանը։

Ֆրանսիայի դեսպանատան մամուլի պատասխանատուն մեզ հետ հեռախոսազրույցում այս տեղեկատվությունը հերքում է, հղում կատարելով ոչ այնքան ճանաչված Courrier d’Erevan էլեկտրոնային պարբերականի վրա։ «Մենք հերքումն ուղարկել ենք Courrier d’Erevan, մեր ֆեյսբուքյան էջում էլ իրենց հրապարակումը տեղադրել ենք»,-հայտնեց դեսպանատան մամուլի պատասխանատուն։ Բացում ենք դեսպանատան ֆեյսբուքյան էջը և կարդում ենք․ «Ֆրանսիայի արտաքին գործերի նախարարության և Ֆրանսիայի դեսպանության պատասխանը Le Courrier d'Erevan-ին՝ դեսպան Անն Լույոյի հասցեին ուղղված կեղծ լուրերի վերաբերյալ։ Դեսպան Անն Լույոյի հասցեին ուղղված զրպարտչական և չարամիտ լուրերը որևէ հիմք չունեն։ Ֆրանսիայի արտաքին գործերի նախարարությունը և Հայաստանում Ֆրանսիայի դեսպանությունը պաշտոնապես հերքում են դրանք և դատապարտում են կեղծ փաստաթղթերի օգտագործումը։ Դեսպանն իրեն իրավունք է վերապահում հարցին տալ իրավական ընթացք: Դեսպան Անն Լույոն աշխատում է Երևանում՝ ծառայելով ֆրանս-հայկական հարաբերություններին և մեր երկու երկրների բարեկամությանը»։

Մամուլի պատասխանատուին հարցրինք, թե ինչ լրատվամիջոց է Courrier d’Erevan-ը, ինչ կապ ունի դեսպանատան հետ, և ինչու դեսպանատունն իր հերքումը չի տեղադրում իր դեսպանատան պաշտոնական էջին, հստակ տեղեկություններ չի նշում, թե ինչն է հերքում, այլ տարածում է ինչ-որ պարբերականի նյութ։ «Courrier d’Erevan-ը ֆրանսիական մեդիա է Հայաստանում։ Պաշտոնական կայքում հերքումը չկա։ Մեզ հարցում են արել, ոնց որ դուք։ Մեր դեսպանատան էջը մտեք, կտեսնեք»,-ասաց մամուլի պատասխանատուն։

Բայց մեր նշած տեղեկությունը միլիոնավոր դիտումներ է հավաքում սոցհարթակներում, ինչո՞ւ ձեր պաշտոնական կայքում չեք դնում հերքումը։ «Թույլ տվեք մենք որոշենք, հա՞։ Մեզ գրավոր հարցում են ուղարկել, մենք պատասխանել ենք։ Մենք հերքում ենք այդ բոլոր տեղեկությունները։ Լեո Նիկոլիանին այդքան կարևորություն տալ ու կայքում դնել նման տեղեկատվություն, կարծում եմ՝ սխալ է։ Ոմն Լեո Նիկոլիանի կողմից, ով պրոկրեմլյան կերպար է և պատմություններ է հորինել` կեղծ զրպարտանքներ դեսպանի հանդեպ»,-ասաց պատասխանատուն։

Ի դեպ, Լեո Նիկոլիանը Ֆրանսիայում բավականին հայտնի բլոգեր, հետաքննող հեռուստալրագրող է։ Նրա հրապարակումները սոցցանցերում տասնյակ միլիոնների հասնող դիտումներ են հավաքում։ Նա սերտ կապեր ունի Հայաստանի հետ։ 90-ականներին, որպես ռազմական լրագրող, եղել է Հայաստանում, մասնակցել է արցախյան առաջին պատերազմին, բազմաթիվ սյուժեներ ունի՝ ղարաբաղյան պատերազմի ժամանակ նկարահանած։ Հարցազրույցներ ունի Հայաստանի բոլոր նախագահների հետ, ինչպես նաև Նիկոլ Փաշինյանի, երբ վերջինս թերթի խմբագիր էր։ Լեո Նիկոլիանը, որպես մեկնաբան և հանրային գործիչ, հարցազրույց է տվել ռուսական «Դոժդ» հեռուստաընկերությանը, որի ընթացքում Ռուսաստանին պաշտպանող մի շարք հայտարարություններ է արել, աշխատել է աֆրիկյան, արաբական մեդիայի հետ՝ իբրև ֆրանսիացի լրագրող։

Փորձեցինք հասկանալ, թե ինչ լրատվամիջոց է Courrier d’Erevan կայքը։ Կայքի ղեկավարը՝ Զառա Նազարյանը, 90-ականների վերջին աշխատել է Փարիզում, Ֆրանսիայում Հայաստանի դեսպանատանը։ Էդուարդ Նալբանդյանի պաշտոնավարման տարիներին եկել է Հայաստան և աշխատել ՀՀ արտգործնախարարությունում, ապա ազատվել է աշխատանքից և հիմնել Courrier d’Erevan կայքը։ Կայքը ֆինանսավորվում է Ֆրանսիայի դեսպանատան կողմից։

Աղբյուրը՝ hraparak.am