«Եվրատեսիլ 2023»-ի երկրորդ կիսաեզրափակչում Բրյունետի ելույթի պարային հատվածը հենց այն անակնկալն էր, որի մասին երգչուհին չէր բարձրաձայնում լրատվամիջոցների հետ հարցազրույցների ժամանակ:

«Նրանք, ովքեր ինձ ճանաչում են, գիտեն, որ ես սիրում եմ պարել, և այդ պարային հատվածի մասին մտածել էինք դեռևս այն ժամանակ, երբ ես գրում էի երգը»,-երեկ՝ մայիսի 11-ին, կիսաեզրափակիչ համերգից հետո տեղի ունեցած մամուլի ասուլիսին նշել է երգչուհին,-«Երգի երկու տարբերակ ունեցանք՝ առանց պարային ընդմիջման և պարով: Այո, այդ հատվածը գաղտնի պահելը շատ դժվար էր: Ես անդադար կրկնում էի, որ անակնկալ ունեմ: Խոսքը հենց այդ պարի մասին էր»,-հավելել է նա:

Երգչուհուց կրկին հետաքրքրվել են Future Lover երգում հնչող «panic attacks»/տագնապի նոպաներ/ արտահայտության մասին: Ավելի վաղ ունեցած իր հարցազրույցներում Բրյունետը նշել էր, որ առնչվել է մենթալ (հոգեկան) առողջության խնդիրների հետ:

«Ինձ համար դժվար է այդ մասին խոսելը, բայց երբ ես ասում եմ «տագնապ», ես, իսկապես, նկատի ունեմ դա: Շատերն են անցնում մենթալ խնդիրների միջով, ես՝ ևս: Պարզապես, ուզում եմ ասել, որ նորմալ է, երբ տրամադրությունդ լավ չէ: Պետք է, ուղղակի, լինես լավը, անես լավը ու լավ տեսք ունենաս»,-նշել է երգչուհին:

Հավելենք, որ Բրյունետը, հաղթահարելով «Եվրատեսիլ 2023»-ի կիսաեզրափակիչ փուլն, անցել է եզրափակիչ, որը տեղի է ունենալու մայիսի 13-ին: Այդ օրը հաղթանակի համար պայքարելու է 26 երկիր:

Աղբյուրը՝ style.news.am