«Տիտանիկի» խորտակման վայրի մոտակայքում անհետ կորած սուզանավի որոնումների ժամանակ հիդրոլոկատորով հագեցած կանադական ինքնաթիռը ձայներ է որսացել: Որոնողական խմբերը փորձում են գտնել այդ ձայների աղբյուրը: «Արմենպրես»-ի փոխանցմամբ՝ այս մասին Twitter-ում հայտնել է ԱՄՆ առափնյա պահպանության ծառայությունը:

Նշվում է, որ առայժմ հեռակառավարվող ստորջրյա ապարատները դրական արդյունքներ չեն գրանցել, որոնումները շարունակվում են:

Ինչպես հաղորդում է Bloomberg-ը, Նյու Յորքի ժամանակով կեսգիշերի (Երևանի ժամանակով առավոտյան ժամը 8:00-ի) դրությամբ՝ «Տիտան» սուզանավում գտնվող 5 մարդկանց մնացել էր 30 ժամից պակաս շնչելու օդ:

Սուզանավն ուղեկցող նավի հետ կապը կորցրել է հունիսի 18-ին՝ սուզվելուց 1 ժամ 45 րոպե անց: Որոնումներում ներգրավված են ԱՄՆ-ի և Կանադայի խմբերը: Ֆրանսիան ևս ուղարկել է մի նավ՝ սարքավորված ստորջրյա ռոբոտով:

Սուզանավում գտնվող անձանց թվում են բրիտանացի գործարար և հետազոտող Հեմիշ Հարդինգը, Պակիստանի ամենահարուստ մարդկանցից մեկը՝ Շահզադա Դավուդը և նրա որդի Սուլեյմանը, սուզանավը գործարկող OpenGate ընկերության տնօրեն Ստոքթոն Ռաշը և ֆրանսիացի ծովային փորձագետ Փոլ-Անրի Նարժոլեն, որը 35 անգամ սուզվել է դեպի «Տիտանիկի» խորտակման վայրը և RMS Titanic, Inc. ընկերության տնօրենն է:

Հիշեցնենք, որ ավելի վաղ հայտնի էր դարձել, որ բրիտանացի միլիարդատեր Հեմիշ Հարդինգը ևս գտնվել է բաթիսկաֆի (ծովերի և օվկիանոսների մեծ խորություններում գիտական և հետազոտական աշխատանքներ կատարելու համար նախատեսված խորջրյա ինքնագնաց սարք, որը կարող է ջրասուզակներից շատ ավելի խորն ընկղմվել-Tert.am) վրա, որն անհետացել է Ատլանտյան օվկիանոսում՝ դեպի «Տիտանիկ» մարդատար նավի խորտակման վայր էքսկուրսիայի ժամանակ:

Հեմիշ Հարդինգը 58-ամյա գործարար է, օդանավերի վաճառքով և շահագործմամբ զբաղվող Action Aviation-ի սեփականատեր: Նա որպես զբոսաշրջիկ թռել է տիեզերք Blue Origin տիեզերանավով: Նա Գինեսի գրքի եռակի ռեկորդակիր է՝ Երկրի շուրջ ամենաարագ շրջագայությունը երկու բևեռներով, օվկիանոսի ամենախոր հատվածում անցած ամենաերկար ճանապարհը, այդպիսի խորության վրա ամենաերկար տևողությամբ մնալը: