Մեծ Բրիտանիայի բնակիչը, որը 17 տարի բանտում է անցկացրել իրականում չգործած հանցանքի համար, այժմ կարող է ստիպված լինել փոխհատուցել բանտում իր պահպանման ծախսեր: Այս մասին հայտնում է Daily Mail-ը։

57-ամյա Էնդրյու Մալքինսոնն անարդարացիորեն դատապարտվել էր ցմահ բանտարկության՝ բռնաբարության համար, որը նա չէր կատարել։ Ի վերջո տղամարդը շահել է դատը, որի ընթացքում նա ապացուցել է իր անմեղությունը և ազատ արձակվել 17 տարի ճաղերի հետևում անցկացնելուց հետո: Այժմ նա կարող է ստանալ մինչև մեկ միլիոն ֆունտ ստեռլինգ որպես փոխհատուցում իր անօրինական դատվածության համար։

Սակայն բրիտանացի փաստաբան Էդվարդ Հենրին զգուշացրել է, որ փոխհատուցում ստանալու գործընթացը կարող է տարիներ տևել։ Ավելին, վտանգ կա, որ իր պաշտպանյալին կարող են ստիպել զգալի գումար վճարել իր պահման ընթացքում բանտային ծառայությունների համար, ներառյալ սնունդը և կացարանը: Այս փաստն էլ ավելի մեծ վրդովմունք է առաջացրել Մալքինսոնի մոտ։

2003 թվականին այն ժամանակ 40-ամյա Էնդրյու Մալքինսոնը մեղավոր էր ճանաչվել Մանչեսթերի շրջանում մի կնոջ բռնաբարության համար: Տղամարդը դատապարտվել է ցմահ ազատազրկման։ Նրա փաստաբանն ասել է, որ դատավարության և հետագա ազատազրկման ընթացքում Մալքինսոնը պնդել է իր անմեղությունը և «հրաժարվել է խոստովանել սարսափելի հանցագործությունը, որոնք նա չի կատարել»:

Աղբյուրը՝ tert.am