Էկվադորի մայրաքաղաք Կիտոյում նախընտրական միջոցառման ժամանակ սպանվել է նախագահի թեկնածու Ֆեռնանդո Վիլավիսենսիոն, որը կոռուպցիայի և կազմակերպված հանցավորության դեմ խիստ պայքարի ջատագով էր։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։

Նշվում է, որ ըստ տեղի լրատվամիջոցների՝ մոտ 30 կրակոց է լսվել, իսկ սոցցանցերում տարածված տեսանյութերում երևում է, թե ինչպես է Վիլավիսենսիոն պատրաստվում նստել մեքենա, երբ հրաձգություն է սկսվում։

Ըստ գլխավոր դատախազության՝ սպանության կասկածյալը մահացել է դեպքի վայրում ստացած վնասվածքներից։ Փոխհրաձգության հետևանքով նաև 9 մարդ է վիրավորվել, այդ թվում՝ օրենսդիր մարմնի անդամի թեկնածու և 2 ոստիկան։

Դատախազությունը նաև հայտնել է, որ հանցագործության հետ առնչության կասկածանքով 6 մարդ է ձերբակալվել։

Էկվադորի մի շարք քաղաքներում մարդիկ երթերի են դուրս եկել՝ դատապարտելով սպանությունը։

Տեղի ունեցածից հետո նախագահի մեկ այլ թեկնածու՝ Յակու Պերեսը, հայտարարել է իր նախընտրական արշավը դադարեցնելու մասին։

Էկվադորի Ազգային ժողովը ցրվել է 2023 թ. մայիսի 17-ին։ Երկրում արտահերթ համընդհանուր ընտրություններ պետք է կայանան մինչև այս տարվա վերջ։