Մեր զինված ուժերը բավական մեծ հակահարված են տվել և ադրբեջանական դիրքերից մեկը ոչնչացված է՝ զինվորականների հետ իր զրույցի մանրամասները ուղիղ կապով հայտնեց «Մայր Հայաստան» դաշինքի առաջնորդ Անդրանիկ Թևանյանը։ Նա առավոտից դադարեցրել է քարոզարշավն ու գնացել Վարդենիսի տարածաշրջան՝ լարված իրավիճակին տեղում ծանոթանալու։

Այս պահի դրությամբ 4 զոհ և 1 վիրավոր․ սա պաշտոնականն տեղեկությունն է։ Անդրանիկ Թևանյանը փաստեց, որ այս պահին կրակի ինտենսիվությունը նվազել է։ Նա զրուցեց նաև Վարդենիսի ավագանու անդամ Դավիթ Շահնազարյանի հետ, որը վկայեց, որ թշնամին հիմնականում հրետանային միջոցներ է օգտագործել։

«Սկզբնական շրջանում հրետակոծում էին Սոթքի սահմանային դիրքերը, որից հետո սկսեց հրետակոծվել նաև Նորաբակի սահմանը։ Առավոտյան կողմ արդեն տեղեկություն կար, որ թշնամին խախտել է հրադադարի ռեժիմը և սահմանին իրավիճակը լարված է։ Մոտավորապես ժամը 9-ից եղել եմ Սոթքի տարածքում․ ինտենսիվ փոխհրաձգություն էր տեղի ունենում»,-ասաց Դավիթ Շահնազարյանը։

Նա վստահեցրեց, որ տեղի բնակիչների համար այդօրինակ միջադեպերը, ցավոք սրտի, առօրեական են դարձել․ համենայն դեպս, հրաձգային զինատեսակներից կրակոցներին մեծ ուշադրություն չեն դարձնում, բայց արդեն հրետանային միջոցների կրակից մարդիկ անհանգստացել են։ Թեև, ասաց, խուճապ չկա։

Անդրանիկ Թևանյանը մատնանշեց խնդրի քաղաքական կողմը․ Փաշինյանի «խաղաղություն» կոչված օրակարգի շրջանակում թշնամին անընդհատ լկտիանում է և փորձում լարվածություն ստեղծել սահմանին։

«Պետք է զգոն լինենք և կարողանանք խուսափել այդ ոչ ցանկալի զարգացումներից։ Դրա համար էլ մենք ներկայացնում ենք, որ Հայաստանի Հանրապետության թիվ մեկ օրակարգը անվտանգությունն է և այդ օրակարգով էլ քաղաքացիները պետք է ամեն ինչ անեն, որ փոփոխության ենթարկվի Հայաստանի ներքին կյանքը»,-ասաց Անդրանիկ Թևանյանը։

Փաշինյանի քաղաքականությունն օրական 3-4 զոհ է նստում մեր ժողովրդի վրա, փաստեց Թևանյանը, և դրան պետք է վերջ տրվի․ մենք ամեն օր արթնանում ենք մի բացասական լուրի սպասելով։ Անդրանիկ Թևանյանը կշարունակի շփվել գյուղերի բնակիչների հետ և կտեղեկացնի նորությունների մասին։

***

«Մայր Հայաստան» դաշինքի առաջնորդ Անդրանիկ Թևանյանն ու ռազմական գործիչ Գևորգ Գևորգյանը Սոթքում են, որտեղի դիրքերը առավոտից Ադրբեջանը հրետակոծում է հրետանային միջոցներից, ունենք զոհեր և վիրավոր։

Անդրանիկ Թևանյանը ուղիղ միացմամբ հայտնեց, որ Սոթքից հակասական տեղեկություններ կային, այդ պատճառով իրենք, չնայած որոշակի խոչընդոտների, հասան այնտեղ՝ իրավիճակին տեղում ծանոթանալու։

«Այս պահին խաղաղ վիճակ է։ Գյուղում, իհարկե, բոլորն էլ լարված են, բայց նաև հանգստություն կա։ Այս պահին կրակոցներ չկան և մեր զինվորականները վերահսկում են իրավիճակը»,-փաստեց Անդրանիկ Թևանյանը։

Գևորգ Գևորգյանը նշեց, որ ագրեսոր և ցեղասպան քաղաքականություն վարող մեր թշնամի պետությունը շարունակելու է ոտնձգություններն այնքան ժամանակ, քանի դեռ չենք կարողացել հեռացնել Հայաստանի իշխանությունը զավթած ամբողջ վարչակազմը, որը ծառայում է թուրքական իշխանությանը։

«Դրա համար իմ կոչն է՝ հարգելի ժողովուրդ, մենք իրապես ժամանակ չունենք, մենք տեսնում ենք՝ ինչ է տեղի ունենում և հասկանում ենք՝ ինչքան քիչ ժամանակ մենք ունենք։ Չի կարելի թույլ տալ, որ ամեն օր, ամեն վայրկյան մեր զինվորները, մեր սպաները զոհվեն։ Իսկ որպեսզի մենք հաղթենք այս պատերազմը, պետք է հեռացնենք այս իշխանությանը միասնական ուժով»,-ասաց ռազմական գործիչը։

Անդրանիկ Թևանյանը նկատեց, որ խաղաղության օրակարգը իրականում այն չէ, ինչ ներկայացնում է Նիկոլ Փաշինյանը․ իրականում դա պատերազմի, պարտության ու զոհերի օրակարգ է։

«Մենք համոզված ենք, որ իրական խաղաղության օրակարգը հնարավոր է լինելու Հայաստանում ներքին օրակարգի փոփոխությունների հասնելուց հետո։ Մենք բարի ծառայություն ենք մաղթում մեր զինվորականներին, ցավակցում ենք զոհերի հարազատներին, և տա Աստված, որ մենք այլևս զոհեր չունենանք և ամեն ինչ խաղաղ լինի»,-ասաց Անդրանիկ Թևանյանը Սոթքից ուղիղ միացմամբ։