«Իրավունք» թերթը գրում է․ «Փետրվարի 10-ին Երևանի կենտրոնում «Համմեր» մակնիշի մեքենայով վոյաժներ իրականացրած Արարատի բնակիչ Գեղամ Սահրադյանը մեղսունակ է ճանաչվել, նրան սպառնում է մինչև 10 տարվա ազատազրկում: Գեղամը կալանքը կրում է «Սովետաշեն» ՔԿՀ-ում, որտեղ շարունակում է ստանալ մեթադոնային բուժում (Մեթադոնը սինթետիկ ափիոնային թմրամիջոց է, որը կիրառվում է փոխարինող բուժման նպատակով: Բուժման մեջ մեթադոնի նշանակումն իրականացվում է ամբուլատոր ռեժիմով, այն անվճար է- Ի.Ա.): Բայց դոզան իր իսկ կամքով քչացրել է, արդեն կամաց-կամաց ադեկվատ է դառնում, կարծես մեթադոնային բուժում իր արդյունքը տվել է: Այս մասին «Իրավունքի» հետ զրույցում ասաց Գեղամի մայրը` տիկին Արփինեն` ընդգծելով.

—Գործի նյութերում կա դատահոգեբուժական փորձաքննության եզրակացություն, որը հաստատում է, որ Գեղամը հոգեկան խնդիրներ ունի: Սակայն փորձագետը միաժամանակ նշել է, որ Սահրադյանն ունի հոգեկան խնդիրներ` «ոչ պսիխոտիկ և վարքային խանգարումներ, թմրանյութերի և այլ հոգեակտիվ նյութերի համակցված գործածման հետևանքով»: Հոգեբույժը գրել է, որ ինքը մեղսունակ է, բայց եղել է դեղի ազդեցության տակ: Եվ սրա վերաբերյալ էլ կա փորձաքննական եզրակացություն, բայց փաստորեն հիմա ընտրովի է ամեն ինչ, անգամ թմրամոլին համապատասխան եզրկացություն տալը պետք է վերևից արտոնված լինի»: