Իրանի նախագահ Էբրահիմ Ռաիսին ասել է, որ մահմեդական երկրները և աշխարհի ազատ երկրները պետք է «վճռական և անհապաղ» գործողություններ ձեռնարկեն՝ կանգնեցնելու իսրայելական «մարդասպան մեքենան», որն ուղղված է Գազայի հատվածում անպաշտպան պաղեստինցի ժողովրդի դեմ, գրում է Mehr-ը։

Շաբաթ օրն Օմանի սուլթան Հայթամ բեն Թարիքի հետ հեռախոսազրույցում Ռաիսին զգուշացրել է, որ Իսրայելի հանցագործություններին՝ արևմտյան երկրների, հատկապես ԱՄՆ-ի անսահմանափակ աջակցությունը հանգեցրել է ավելի մեծ բարդությունների և իրավիճակի վատթարացման, հաղորդում է Press TV-ն։

Ռաիսիի խոսքով՝ «Պաղեստինյան դիմադրության խմբերը սկսել են «Ալ-Աքսայի փոթորիկ» գործողությունը՝ վերջին ամիսներին ռեժիմի հանցագործությունների աճից հետո»:

Այս օպերացիան, նրա խոսքով, հունից հանել է Իսրայելի և Արևմուտքի հաշվարկները։

«Իրանի նախագահը նաև տագնապ է հայտնել Իսրայելի և նրա դաշնակիցների կողմից Գազայում ջարդեր իրականացնելու և պաղեստինցիներին քաղաքը տարհանել ստիպելու համար, քանի որ Թել Ավիվի ռեժիմը շարունակում է անջատել ջուրն ու էլեկտրաէներգիան և կանխել դեղորայքի և սննդի ներմուծումը»,-գրում է լրատվամիջոցը։

Օմանի սուլթան Հայթամ բեն Թարիքն իր հերթին աջակցություն է հայտնել Իրանի Իսլամական Հանրապետության դիրքորոշմանն՝ ի պաշտպանություն Պաղեստինի ճնշված ժողովրդի և հայտարարել է, որ «մենք չպետք է թույլ տանք Պաղեստինի ճնշված ժողովրդին տեղահանելու և նրանց տեղահանումներ պարտադրելու քաղաքականության կրկնությունը»։

Սուլթանը նաև համաձայնել է Իրանի նախագահի տեսակետներին՝ կապված Իսլամական Ումմայի ուժի և կարողությունների հետ՝ դադարեցնելու Գազայում շարունակվող ճնշումների և բռնությունների գործընթացը և նշել. «Մենք կապի մեջ ենք բոլոր կողմերի հետ, որոնք կարող են արդյունավետ լինել և դեր խաղալ այս հանցագործությունները կասեցնելու գործում»:

Իրանի նախագահը պաղեստինա-իսրայելական սրացման թեմայով բանակցություններ է վարել նաև Իրաքի վարչապետի և Կատարի էմիրի հետ։

Աղբյուրը՝ news.am