Հրդեհ է բռնկվել ԵՊՀ մասնաշենքերից մեկում, որտեղ գտնվում են Քիմիայի, Աշխարհագրության ֆակուլտետները, Ֆարմացիայի ինստիտուտը։ Դեպքի վայր են ժամանել ՆԳՆ փրկարար ծառայության 3-4 մեքենա, ինչպես նաև Շտապ օգնությունը։ Այս մասին Infocom-ի փոխանցմամբ դեպքի վայրից փոխանցում է ականատեսը։

Հրդեհի պատճառները դեռևս հայտնի չեն, հնարավոր տուժածների վերաբերյալ տեղեկություն այս պահին առկա չէ։

***

Քիչ առաջ ողբերգական դեպք է տեղի ունեցել Երևանում: Ժամը 9:40-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Երևանի պետական համալսարանի մասնաշենքերից մեկում հրդեհ է բռնկվել:

Ինչպես դեպքի վայրից հայտնում է shamshyan.com-ը, ժամանել են հրշեջ-փրկարարական ջոկատների 6 մարտական հաշվարկ, ժամանել են նաև ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի պարեկները, ովքեր սահմանազատել են տարածքը, որպեսզի քաղաքացիները չխանգարեն հրշեջների և օպերատիվորեն ժամանած շտապօգնության բժիշկների աշխատանքը:

Դեպքի վայրից 3 հոգի այրվածքներով շտապօգնության բժիշկների կողմից տեղափոխվել են հիվանդանոց, ներսում հրշեջները հետախուզական աշխատանքներ են կատարել, հայտնաբերել են 1 դի, պարեկային ծառայության 1 աշխատակից էլ տարհանման աշխատանքներ կատարելիս թունավորվել է ծխից:

Tert.am-ին հայտնում են ԵՊՀ ուսանողական խորհրդից, որ ԵՊՀ մասնաշենքերից մեկի նկուղում պայթուն է եղել:

Տեսանյութերը կարող եք դիտել մեր տելեգրամյան ալիքում:

***

Երևանի պետական համալսարանում տեղի ունեցած հրդեհի հետևանքով տուժածները վարչական աշխատակիցներ են:

«Արմենպրես»-ին այս մասին տեղեկացրեց ԵՊՀ-ի մամուլի խոսնակ Քնար Միսակյանը:

Ավելի վաղ տեղեկացրել էինք, որ ԵՊՀ 1-ին մասնաշենքի նկուղային հարկի սենյակներից մեկում հրդեհ է բռնկվել, որից հետո պայթյուն եղել։

Նախնական վարկածով հրդեհը բռնկվել է հոսանքի տատանումների պատճառով։

Առողջապահության նախարարությունից հայտնել են, որ պայթյունի հետևանքով կան տուժածներ։

Նախնական տվյալներով՝ կա մահվան դեպք: Տուժածների առողջական վիճակի վերաբերյալ կտրամադրվի լրացուցիչ տեղեկատվություն:

***

ԵՊՀ-ում այսօր առավոտյան քիմիական ֆակուլտետի նկուղում տեղի ունեցած պայթյունի հետևանքով այրվածաքաբանական կենտրոն է տեղափոխվել 2 քաղաքացի:

Կենտրոնից NEWS.am-ին հայտնեցին, որ տուժածներն են 70-ամյա Սեյրան Բիչախչյանը և 65-ամյա Ահարոն Հակոբյանը:

«Այստեղ նրանց վիրակապեցինք և ուղարկեցինք «Արմենիա» բժշկական կենտրոն: Նրանք ունեին պոլիտրավմա, բազմաբեկորային վնասվածք, քիմիական այրվածքներ 3-րդ աստիճանի»,-ասացին այրվածքաբանության կենտրոնից:

***

Երևանի պետական համալսարանի մասնաշենքերից մեկում տեղի ունեցած դեպքի հետևանքով 3 տուժածներից մեկի առողջական վիճակը գնահատվում է ծայրահեղ ծանր: Այս մասին հայտնում են ՀՀ առողջապահության նախարարությունից՝ նշելով, որ նա գտնվում է վերակենդանացման բաժանմունքում:

Մյուս տուժածի առողջական վիճակը միջին ծանրության է, երրորդինը` բավարար: