Իսրայելը դատապարտել է Եմենի հութիների կողմից Կարմիր ծովում Galaxy Leader առևտրային նավի գրավումը և մեղադրել Իրանին։ Ասվում է Իսրայելի վարչապետ Բենիամին Նեթանյահուի գրասենյակի հայտարարության մեջ։

Ավելի վաղ արաբական լրատվամիջոցները հայտնել էին, որ կիրակի օրը Եմենի հյուսիսում իշխող Անսար Ալլահ շարժման մարտիկներին հաջողվել է Կարմիր ծովում կալանել Galaxy Leader առևտրային բեռնանավը, որը կրում է Բահամյան կղզիների դրոշը, բայց ենթադրաբար պատկանում է իսրայելական ընկերությանը։

Հութիներն ասել են, որ իրենք դա արել են որպես Գազայի հատվածում պաղեստինյան խմբավորումներին աջակցելու նշան՝ Իսրայելի ռազմական գործողությունների ֆոնին:

Իսրայելի պաշտպանության բանակն ավելի ուշ հայտարարեց, որ նավը իսրայելական չէ, և որ անձնակազմում իսրայելցիներ չկան։

«Մենք խստորեն դատապարտում ենք Իրանի հարձակումը միջազգային նավի վրա: Նավը, որը պատկանում է բրիտանական ընկերությանը և կառավարվում է ճապոնական ընկերության կողմից, Իրանի հրամանով զավթվել է Եմենում հութի զինյալների կողմից»,-ասվում է Իսրայելի վարչապետի գրասենյակի հայտարարության մեջ:

Աղբյուրը՝ tert.am