Ուկրաինական խոցված անօդաչու թռչող սարքը, կորցնելով կառավարումը, Տուլայում մխրճվել է բազմաբնակարան բնակելի շենքի մեջ: Տեղեկությունը հայտնել է Տուլայի շրջանի նահանգապետ Ալեքսեյ Դյումինը:

«Նոյեմբերի լույս 26-ի գիշերը Տուլայի մարզի տարածքում կանխվել է երկու անօդաչու թռչող սարքերի հարձակումը։ Երկուսն էլ խոցվել են ՌԴ պաշտպանության նախարարության ՀՕՊ միջոցներով։ Նրանցից մեկը, կորցնելով կառավարումը, Տուլայում բախվել է բազմաբնակարան բնակելի շենքին»,-նրա խոսքը մեջբերել է շրջանի կառավարության Telegram-ալիքը։

Դյումինի խոսքով՝ լուրջ ավերածություններ չկան, վնասվել են երեք բնակարանների ապակիները, բնակիչներից մեկը թեթև վնասվածք է ստացել, նրան բուժօգնություն է ցուցաբերվել:

Շրջանի իշխանությունները հավելել են, որ ավելի ուշ Տուլայում ռադիոէլեկտրոնային պայքարի միջոցները ճնշել են ևս մեկ անօդաչու սարքի․ տուժածներ և ենթակառուցվածքի վնասներ չկան: