Ադրբեջանի տարբեր շրջաններում անչափահաս հարսնացուների հայրերը չեղարկում են ավելի վաղ կնքված ներընտանեկան համաձայնություններն ամուսնության մասին։ Ադրբեջանի երեխաների միության նախագահ Քամալա Աղազադեի խոսքով, ինչպես տեղեկացրել է Turan-ը, այդ միտումն արտացոլվում է նաև երիտասարդ փեսացուների խզված ամուսնական համաձայնություններում, որոնք նշանադրվել են անչափահաս աղջիկների հետ։

Աղազադեն ուշադրություն է հրավիրել ծնողների անհանգստության վրա՝ կապված հնարավոր ձերբակալությունների հետ։ Երեխաների միությունը ստացել է հարյուրավոր տեղեկություններ, հատկապես վերջին վեց ամիսներին, որոնցում մանրամասն նկարագրված են եղել անօրինական ամուսնությունները։ Աղջիկները և տղաները, որոնց ստիպում են ամուսնանալ մինչև 18 տարեկան հասակում, օգնություն են խնդրում, ինչն ստիպել է կազմակերպությանը այդ մասին տեղեկացնել ներքին գործերի նախարարությանը և Ընտանիքի, երեխաների և կանանց գործերի պետական կոմիտեին։ Անօրիանական ամուսնությունների դեպքերը համարվում են անթույլատրելի, և Երեխաների պաշտպանության միությունն աշխատում է լուծել այդ խնդիրը, ներառյալ հոգեբանական վերականգնման ծրագրերը հարկադրական ամուսնությունների անչափահաս զոհերի համար։

Անօրինական ամուսնությունների հետ կապված զանգվածային բողոքը հաջորդել է Մուբարիզ Գուլիևի ձերբակալությանը։ Նա Սաբիրաբադի շրջանի Մյամիշլի գյուղում դեկտեմբերի 29-ին նշանված 12-ամյա աղջկա հայրն է։ Հետաքննության ընթացքում պարզվել է, որ 12-ամյա աղջկա «փեսացուն» 32-ամյա Քյարիմն էր, նշել է Քամալա Աղազադեն։

Ներքին գործերի նախարարությանն այս մասին հայտնի է դարձել սոցցանցերում դրա ակտիվ քննարկումից հետո։ Քյարիմը համոզմունք է հայտնել, որ երեխայի հետ ամուսնությունը չպետք է դիտարկվի որպես հանցագործություն։

Այս միջադեպը տեղի է ունեցել 2022թ. հոկտեմբերին Սաբիրաբադի շրջանում տեղի ունեցած ձերբակալությունից հետո, որտեղ ոստիկանությունը բերման էր ենթարկել մի տղամարդու, որն ամուսնացել էր 17-ամյա աղջկա հետ։ Ադրբեջանում օրենքը թույլ է տալիս ամուսնական հարաբերություններ կնքել միայն 18 տարեկանից հետո։

Աղբյուրը՝ news.am