Պատմությունը կարձանագրի, թե ժողովրդական կամ վաստակավոր արտիստի կոչումներ ունեցող մարդիկ ինչ հետագիծ են թողնելու ու ինչ հետագիծ է թողնելու քաղաքական մեծամասնությունը։ ՀՀ Ազգային ժողովի այս տարվա առաջին նիստում այս մասին հայտարարեց ՀՀ ԱԺ «Հայաստան» խմբակցության պատգամավոր Լիլիթ Գալստյանը` անդրադառնալով ՀՀ կառավարության ներկայացրած աղմկահարույց ՀՀ պետական պարգևների և պատվավոր կոչումների մասին» ՀՀ օրենքում փոփոխություններ կատարելու մասին նախագծին։

Ավելի վաղ հայտնել էինք, որ ՀՀ կառավարությունն Ազգային ժողովին առաջարկում է չեղարկել պատվավոր կոչումների համակարգը։

«Օ՜ֆ, աման»,–արձագանքեց ՀՀ ԱԺ նախագահ Ալեն Սիմոնյանը։

Նշենք, որ ՀՀ արդարադատության նախարարի տեղակալ Արմենուհի Հարությունյանն իր ելույթում ասել էր, որ ՀՀ–ում գործում է 17 պատվավոր կոչում, իսկ վերջին հինգ տարում 1 181 մարդու է շնորհվել ժողովդրական կամ վաստակավոր արտիստի կոչում։ Արդեն իսկ կոչում ստացած անձինք պահպանելու իրենց կոչումներն ու արտոնությունները, ստանալու են պետության կողմից տրվող գումաները, օրինակ` ժողովրդական արտիստի դեպքում` ամսական 40 հազար դրամ։

«Նիկոլայ Ծատուրյան, Փարավոն Միրզոյան, Վլադիլեն Բալյան, Դավիթ Բաբայան և այլն: Ամենայն հարգանքով այս մարդկանց նկատմամբ, որևէ մեկս ճանաչո՞ւմ է այս մարդկանց` որպես ժողվրդական արտիստ. եթե հարցում անեք, որևէ մեկը չի ճանաչում»,–հայտարարել էր փոխնախարարը։

Ըստ նրա` այսուհետ ոչ թե պետությունը, այլ տվյալ մշակութային կառույցները կշնորհեն նման կոչումներ, իսկ պետությունն ուղղակի կաջակցի, այլ ոչ թե կմիջամտի այդ կոչումների շնորհմանը։

Հիշեցնենք, որ ՀՀ կառավարությունն Ազգային ժողովին առաջարկում է չեղարկել պատվավոր կոչումների համակարգը։ Դրանով առաջարկվում է չեղարկել «ժողովրդական» և «վաստակավոր» 17 պատվավոր կոչումները և ներդնել խրախուսման այլ՝ առավել ժամանակակից ինստիտուտ։ Ըստ կառավարության` կոչումների համակարգը ներմուծվել է խորհրդային ժամանակներում՝ տարբեր անհատների արժանի կամ արժանի տիտղոսավորելու համար, սակայն նաև բազմաթիվ դեպքեր են եղել, երբ անհատը կոչումը ստանալուց հետո դադարել է որևէ կերպ առաջընթաց գրանցել իր մասնագիտական ոլորտում։

Աղբյուրը՝ armeniasputnik.am