Ամանորյա հրավառությունների և ճայթռուկների անզգույշ օգտագործման հետևանքով այս տարի (հունվարի 1-8-ի տվյալներով) 9 երեխա է տարբեր վնասվածքներով հայաստանյան բուժկենտրոններ ընդունվել։ Sputnik Արմենիային տեղեկությունը հայտնել են ՀՀ առողջապահության նախարարությունից։

Թեպետ «Լիցենզավորման մասին» օրենքում կատարված փոփոխություններով հրավառ նյութերի վաճառքը 16 տարին չլրացած անձանց արգելվել է, բայց, այնուամենայնիվ, այս տարի ևս երեխաներ տուժեցին ճայթռուկների օգտագործումից։

«Հերացի» համալսարանական հիվանդանոցի Պլաստիկ վիրաբուժության և միկրովիրաբուժական կլինիկայի բժիշկ Արտյոմ Նավոյանն ասում է՝ իրենց մոտ կատակում են, թե կաթողիկոսի ամանորյա ուղերձից առաջ միկրովիրաբույժները պետք է ուղերձով հանդես գան, զգուշացնեն, հորդորեն, բացատրեն, համոզեն հեռու մնալ տարատեսակ պայթուցիկների, հրավառությունների օգտագործումից։

Հունվարի 3-ի դրությամբ՝ «Հերացի» թիվ 1 հիվանդանոց դիմել են պայթուցիկների, ճայթռուկների օգտագործումից տուժած 5 քաղաքացիներ։ Նրանցից 2-ի մոտ եղել է ձախ դաստակի մատների ամպուտացիայի կարիք, իսկ 2 պացիենտի մոտ արձանագրվել է պատռված վերք, 1-ի մոտ` մատի վնասվածք:

Նրա խոսքով՝ պայթուցիկի հետևանքով վնասվածք ստացած առաջին պացիենտն ընդունվել է հունվարի 1-ին՝ 00։04։ Առավոտյան ժամը 7-ին մոտ նաև Սյունիքի մարզից են նմանատիպ վնասվածքով պացիենտ բերել, ունեցել են նաև Արագածոտնի ու Տավուշի մարզերից բերված պացիենտներ։

Միկրովիրաբույժը շեշտում է՝ պայթուցիկների օգտագործման հետևանքով ստացած վնասվածքները հիմնականում չվերականգնվող են, որովհետև մանր կտորների են բաժանում, բացի այդ՝ այրվածքներ պատճառում։

«Իմ պրակտիկայի ամենասարսափելի դեպքերից մեկը նաև այս վնասվածքով ինձ հանդիպած ամենափոքր պացիենտն էր՝ 7-ամյա Մհերը Իջևանից։ Բավականին լուրջ վնասվածք էր, որի հետևանքով կորցրեց ամբողջ դաստակը»,-ասում է բժիշկը։

Հավելում է՝ այս պատմություններում ամենավատն այն է, որ երեխաները ոչ թե գաղտնի են հրավառ նյութերը, պայթուցիկները գնում, այլ հաճախ հենց ծնողն է այն տալիս երեխային։

Բժիշկն ասում է՝ իր 25 տարվա աշխատանքային փորձը ցույց է տալիս՝ Նոր տարվա գիշերը այսպիսի վնասվածքներով ընդունվողների թիվը չի նվազում։ Վստահ է՝ միակ ելքը պայթուցիկների, հրավառ նյութերի վաճառքի խիստ արգելքն է, այլապես ամեն տարի խոսելու ենք, զգուշացնելու ենք, միաժամանակ ամեն տարի հունվարի 1-ի գիշերը հրավառությունների հետևանքով ամպուտացված մատներով երեխաներ ենք ունենալու։